Bank RBK-daǵy jymqyrý isi: Jomart Ertaevty 11 jylǵa bas bostandyǵynan aıyrý suraldy

Almatyda Bank RBK-dan 144 mıllıard teńge jymqyrý isine qatysty sot otyrysy aıaqtaldy. Prokýror eks-bankır Jomart Ertaevqa 11 jyl bas bostandyǵynan aıyrý jazasyn surady. Bul týraly Almaly aýdandyq sotynyń baspasóz qyzmeti habarlady.

"Prokýror asa aýyr emes jaza men asa aýyr jazany biriktirý arqyly 11 jyl bas bostandyǵynan aıyrý jazasyn surady. Onymen qosa múlkin tárkileý, 5 jyl materıaldyq jaýapkershilikpen baılanysty kommersııalyq jáne qarjy qyzmetinen aınalysý quqynan aıyrý, jazasyn ortasha qaýipsizdiktegi qylmystyq-atqarý júıesi mekemesinde jazasyn óteýdi talap etti" dedi sottaǵylar.

Bank RBK basqarmasynyń eks-basshysy Igor Majınov jáne Marpý Jaqybaeva, sondaı-aq Qazaq banki-niń burynǵy aksıoneri Baqyt Ibragımge qatysty memlekettik aıyptaý 8 jyl bas bostandyǵynan aıyrý jazasyn surady.    

Marpý Jaqybaeva 2011 jáne 2015 jyldar aralyǵynda Bank RBK basshylyǵynan bonýs retinde alǵan 100,2 mıllıon teńgesin zardap shekken tarapqa qaıtarǵan kórinedi. Igor Majınov te 37,2 mıllıon teńgeniń ornyn toltyrdy. Al Baqyt Ibragım kinásin moıyndap, qylmystyq isti tergeýge kómektesti de,17,3 mıllıard teńgeniń shyǵynyn ótedi.

Bul is boıynsha 37 adamǵa qatysty sot prosesi júrdi. Prokýror solardyń 36-syn kináli dep tanýdy surady. Jaýapqa tartylǵan bir adam qaıtys bolǵan.

Bank RBK-inen 144 mıllıard teńge jymqyrý isine qatysty sot ótken jyldyń aıaǵynda bastalǵan. Tergeý derekterine súıensek, qylmys 2011-2017 jyldar aralyǵynda jasalǵan. Qylmystyq is 46 epızod jáne 700 tomnan turady. Aıyptaý aktisinde 3600-dan asa paraqsha bar.