Maqsat Kıkımov Almaty qalasy ákiminiń orynbasary bolyp taǵaıyndaldy

Almaty ákimi Baqytjan Saǵyntaevtyń ókimimen Qazaqstan Respýblıkasy Prezıdenti Ákimshiliginiń kelisimi boıynsha Almaty qalasy ákiminiń orynbasary bolyp Maqsat Qıqymov taǵaıyndaldy. Bul týraly Almaty qalalyq ákimdiginiń resmı paraqshasynda jarııalandy. 

Osyǵan deıin qala ákiminiń orynbasary qyzmetinde bolǵan Saparbek Tuıaqbaev óziniń áleýmettik jelidegi paraqshasynda birge qyzmet etken barlyq áriptesine alǵys bildirdi.

Maqsat Kıkımov 1986 jyly dúnıege kelgen. Bank isi akademııasy kolledjiniń, Almaty Ekonomıka jáne statıstıka akademııasynyń, "Turan" ýnıversıtetiniń túlegi. Qarjy, munaı salalarynda jáne memlekettik qyzmette 15 jyldan asa jalpy eńbek ótili bar.

Eńbek jolyn 2005 jyly "Alıans bank" AQ Almaty qalasyndaǵy fılıalynyń býhgalterlik esep jáne eseptilik bóliminiń mamany bolyp bastaǵan. 2006-2012 jyldary "Alıans bank" AQ Almaty qalasyndaǵy fılıalynda bas maman, bas býhgalterdiń orynbasary, bas býhgalter, bek-ofıstiń basqarýshysy, "Astana-fınans" Banki AQ Almaty fılıalynyń bas býhgalteri, "Transervıs-Mıllenıým" JShS qarjy dırektory, ádisnama basqarmasynyń bastyǵy, ádisnama jáne avtomattandyrý jáne bıznes-prosester basqarmasynyń bastyǵy, "Kredıt Altyn Bank" AQ bas esepshi basqarma múshesi, "Bank RBK"AQ banktik tehnologııalar departamenti dırektorynyń orynbasary,  Almaty qalasy qarjy basqarmasy basshysynyń orynbasary, Almaty qalasy Ekonomıka jáne bıýdjettik josparlaý basqarmasynyń basshysy bolyp jumys istedi.

2017 jyldyń qyrkúıeginen 2018 jyldyń shildesine deıin Almaty qalasy Kásipkerlik jáne ındýstrıaldy-ınnovasııalyq damý basqarmasynyń basshysy, 2018 jyldyń shildesinen 2019 jyldyń shildesine deıin Almaty qalasy týrızm basqarmasynyń basshysy, 2019 jyldyń shilde aıynan bastap Almaty qalasy Jetisý aýdanynyń ákimi qyzmetterin atqardy.