14 Qyrkúıek, 2020 Barlyq aımaqtar

Sportshy Qýat Hamıtov polısııaǵa jetkizildi (vıdeo)

Foto: prosports.kz

Belgili sportshy Qýat Hamıtov Almaty qalasynyń polısııa departamentine jetkizildi. Ol qalada dezınfeksııa jasap júrgenderdi halyqty ýlaýshylar dep atap olardy uryp-soǵýǵa, ushyp bara jatqan tikushaqty atyp túsirýge shaqyryp, vıdeoúndeý jasaǵan.

Polısııa departamenti sportshynyń tıisti prosessýaldyq áreketter júrgizý úshin departamentke jetkizilgenin, tergeý amaldarynyń nátıjesi boıynsha qylmystyq iske qatysty naqty prosesýaldyq sheshim shyǵarylatynyn habarlady.

Hamıtov qylmystyq kodekstiń 272-baby 3-bóligi (bılik ókilderiniń zańdy talaptaryna belsendi túrde baǵynbaýǵa jáne jappaı tártipsizdikke shaqyrý ne jappaı tártipsizdikke arandatý, sol sııaqty azamattarǵa zorlyq-zombylyq jasaýǵa shaqyrý) boıynsha tergelip jatyr.

Atalǵan bapqa sáıkes kináli dep tanylǵan tulǵany úsh jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy kózdelgen.

Hamıtov áleýmettik jelidegi paraqshasyna vıdeoúndeýdi jarııalaǵannan keıin artynan óshirgenimen, vıdeo jelide lezde taralyp ketti.

♦ "Bul – qylmys". Qýat Hamıtovqa qatysty ishki ister mınıstrligi pikir bildirdi

Beınejazbada sportshy dezınfeksııamen aınalysatyn adamdar halyqty ýlap jatyr, soǵystaǵydaı bir adamdy toqtatý arqyly, myń adamdy qutqarýǵa bolatynyn jetkizgen. Sondyqtan dezınfeksııa mamandaryn uryp-soǵýǵa, tikushaqty bar bolyp jatsa Kalashnıkov avtomatymen atyp túsirýge shaqyrǵan.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir