Alekseı Soı tumaýǵa qarsy ekpe saldyrdy

Búgin tańǵy saǵat 8:00-de Densaýlyq saqtaý mınıstri Alekseı Soı Nur-Sultandaǵy №6 qalalyq emhanaǵa baryp, alǵashqylardyń biri bolyp maýsymdyq tumaýǵa qarsy vaksına saldyrdy.

Aıta ketý kerek, 2020 jyly Qazaqstanda egý naýqany 15 qyrkúıek pen 15 qarasha aralyǵynda ótedi, ıaǵnı jyldaǵydan eki aptaǵa erte bastaldy.

DDSU málimetinshe, qazirgi epıdemıologııalyq maýsymda vırýstyń úsh shtamy ózekti bolady: A (H1N1) – Guangdong-Maonan, A (H3N2) – Hong Kong jáne B –Vıktorııa jelisine kiretin Washington. Vaksına atalǵan úsh shtamǵa qarsy tura alady.

– Jylda kúz aıynda JRVI men tumaý órshıdi. 2019-2020 jylǵy epıdemıologııalyq maýsymda JRVI aýyrǵan 431 120 adam tirkeldi, onyń ishinde 2 jarym myńnan astam naýqas zerthanada anyqtalǵaen tumaýǵa shaldyqqan. Bıyl halyqqa vaksınasııa óte qajet, óıtkeni koronavırýs pandemııasy kezinde tumaý da aralasyp, jaǵdaıdy ýshyqtyrýy múmkin, mundaıda qazir qol jetkizgen turaqtylyqty saqtap qalý qıyn bolady, – deıdi Alekseı Soı jýrnalısterge bergen suqbatynda. 

Respýblıka halqynyń 11,7 paıyzyn, al DDSU usynysy boıynsha keminde 10 paıyzyn tumaýǵa qarsy tegin vaksınamen qamtý josparlanǵan.

Tumaýǵa qarsy vaksınasııa táýekel tobyna kiretin myna sanattaǵy adamdar úshin tegin:

• mektep jasyna tolmaǵan jáne mektep jasyndaǵy balalar;
• medısına qyzmetkerleri;
• júkti áıelder (júktiliktiń 2-3 trımestri);
• jabyq mekemelerdegi adamdar (balalar úıi, mektep-ınternattar;
• sozylmaly aýrýy bar eresekter men balalar;
• 60 jastan asqan qarttar. 

Aldyn alý maqsatynda árbir adam tumaýǵa qarsy aqyly egý saldyra alady, ol jeke vaksınasııa ortalyqtarynda, halyqtyń sanıtarııalyq-epıdemıologııalyq salaýattylyǵy salasyndaǵy ýákiletti organnan ruqsaty bar turǵylyqty jeri boıynsha emhanalardaǵy egý kabınetinde júrgiziledi.