12 Qyrkúıek, 2020 NEWS

Praımerızge úmitkerler partııalastarymen kezdesýler ótkizip, baǵdarlamalaryn usynýda

Foto: Ashyq derekkóz

Praımerızge úmitkerler partııalastarymen onlaın jáne betpe-bet kezdesýler ótkizip, belsendi túrde óz baǵdarlamalaryn usynýda. Bul týraly Nur Otan partııasynyń hatshysy Álibek Áldeneı áleýmettik jelidegi paraqshasynda jazdy.

"Praımerızdiń úgit-nasıhat kezeńi ótip jatqanyna bes kún boldy. Aldyn ala talqylap, usynystar engizý úshin óńirlerdiń saılaýaldy baǵdarlamalaryn qamtyǵan 216 joba jarııalandy. Úmitkerler partııalastarymen onlaın jáne betpe-bet kezdesýler ótkizip, belsendi túrde óz baǵdarlamalaryn usynýda. Munyń bári el azamattarynyń arasynda erekshe qyzyǵýshylyq týdyryp jatqany baıqalady. Biri úmitkerlerge sáttilik tilep, qoldaý bildirip jatsa, endi biri kúmándanyp, syn aıtýda.

Mundaı belsendilik quptaıtyndaı jaǵdaı. Saıasattyń negizi – mámilegerlik. Túrli oı-pikirlerdiń tartysty básekesinde ǵana keleli oı, kemel ıdeıalar týyndaıdy. Muny saıasattyń, demokratııanyń shynaıy qaǵıdasy der edim.

Endi praımerızge qatysty týyndap jatqan birqatar saýaldarǵa jaýap berip ótsem deımin.

Birinshi. Praımerız – partııanyń ishki jumysy jáne ol «Nur Otan» partııasynyń ishki qujattaryna negizdelgen. Elimizdegi kez kelgen saıası partııa osy sekildi praımerız ótkizýge quqyly.
Qazirgi tańda praımerız ótkizý tártibi qazaqstandyq zańnamada arnaıy bekitilmegen. Jalpy, bul – keń taralǵan halyqaralyq tájirıbe. Aıtalyq, Kanadada, Fransııada, Italııada, Ońtústik Koreıada, Meksıkada, Irlandııada partııalar praımerız ótkizýdiń mehanızmin, qaǵıdalary men ádis-tásilin ishki qujattar negizinde ózderi ázirleıdi.

Praımerızdi qarjylandyrý máselesine taǵy da toqtala keteıin. Barlyq uıymdastyrý shyǵyndaryna partııanyń óz qarajaty jumsalady, onyń ishinde múshelik jarnadan túsken. Al úmitkerler úgit-nasıhat jumystaryn óz qarjysyna uıymdastyrady.

Ekinshi. Búginde «Nur Otan» partııasy elimiz boıynsha 835 myńnan astam adamdy biriktirip otyr. Partııa ashyq ta jarııaly básekede naǵyz joǵary deńgeıli kandıdattardy iriktep alýǵa múddeli. Biz partııalastarymyz úshin praımerızge qatysty barlyq rásimderdiń túsinikti ári qoljetimdi bolǵanyn qalaımyz. Eń bastysy, qatysýshylardyń báriniń múmkindigi teń bolýy tıis.

Osy oraıda, partııanyń jarǵysy men maqsat-mindetterine negizdelip praımerız ótkizýdiń arnaıy Erejeleri ázirlengen bolatyn. Ol aımaqtyq aktıvterde jan-jaqty talqylaýlardan ótip, partııanyń Saıası keńesinde daýys berý arqyly bekitildi.

Úshinshi. Pandemııaǵa baılanysty praımerızde elektrondy daýys berý tártibi engizildi. Barlyq táýekelderdi saralaı kele partııa quqyqtyq jáne tehnıkalyq máselelerdi ońtaılandyrdy. Banktegideı JSN men telefon nómirine baılanystyra otyryp SMS habarlama alý arqyly tekserý júıesi engizildi.

Aqparattyq-kommýnıkasııa tehnologııalaryna basymdyq berilip otyr. Partııalastarmen kezdesý, debattar kóbine onlaın formatta ótedi. Saqtyq úshin kúndelikti qolǵap, maska, antıseptıkter qoldanylady. Is-sharalar jeldetiletin bólmelerde, áleýmettik ara-qashyqtyqty saqtaý arqyly ótýde. Elimizdiń Bas sanıtarlyq dárigeriniń maquldaýymen tıisti reglament qabyldandy.

Tórtinshi. Partııaishilik irikteý ótkizý kezinde partııaǵa úgit-nasıhat júrgizýge qandaı da bir basymdyq berilip, saılaý zańnamasyna qaıshy keletin jaıttar jaıly pikirler aıtylýda. Bul quqyqtyq jaǵynan jańsaq pikir der edim. «Qazaqstan Respýblıkasyndaǵy saılaý týraly» QR Konstıtýsııalyq zańynda kórsetilgen normalar, onyń ishinde BAQ-ta úgit-nasıhat júrgizýge teńdeı quqyq beretin talap memleket bekitken saılaý naýqany kezinde ǵana kúshine enedi. Ári onyń tártibi zańda anyq kórsetilgen. Bul másele jóninde QR Bas Prokýrorynyń orynbasary Marat Ahmetjanov 8 qyrkúıekte Ortalyq kommýnıkasııalar qyzmetinde ótken brıfıngte egjeı-tegjeıli túsindirip bergen bolatyn.

Aqparat quraldary saıası partııalardyń qyzmeti men basqa da máseleler jóninde olardyń saıası belsendiligine, taqyryptardyń ózektiligi men óz aýdıtorııasyn qyzyqtyratyn máselelerge qaraı aqparattandyratyny anyq. Sol úshin partııalar tek saılaý kezinde emes, barlyq kezde de turaqty ári júıeli jumys isteýi kerek.

Praımerız ótkizý arqyly «Nur Otan» keń aýqymda qoǵamdyq dıskýssııa qura bildi. Búginde bıliktiń zań shyǵarýshy jáne ókiletti organdarynyń tıimdiligin arttyrý máselesi óte ózekti bolyp otyr. Bul turǵyda elimizdegi jetekshi saıası kúsh retinde «Nur Otan» partııasynyń jańa kóshbasshylardy anyqtap, tyń ıdeıalardy usynýǵa múmkindigi mol ekeni sózsiz. Praımerızge qatysyp jatqan adamnyń sany osyǵan naqty dálel bola alady. Kóptegen azamattar osy úshin partııa qataryna kirdi, onyń ishinde basqa partııadan aýysqandary da bar.

Praımerızdiń úgit-nasıhat kezeńi áli úsh aptadan astam ýaqyt ótkiziletin bolady. Olar mazmundy ótip, qoǵam men naqty óńirler boıynsha ózekti máselelerdi talqylaýǵa múmkindik týǵyzady degen senimdemin.

Sondaı-aq, Feısbýk arqyly barshańyzdy óńirlerdiń saılaýaldy baǵdarlamasyn qamtyǵan 216 joba boıynsha belsendi túrde pikir bildirýge shaqyramyn (https://primaries.kz/page/programmy-regionov). Atalǵan jobalar árbir aýdan, qala, oblystyń aldaǵy bes jylǵa josparlanǵan damý baǵytyn aıqyndaıdy.

Jurtshylyqpen belsendi keri baılanys bul jobalardy jan-jaqty tolyqtyrýǵa, qordalanǵan máselelerdi barynsha qamtýǵa jáne utymdy sheshim qabyldaýǵa múmkindik beretini anyq" delingen áleýmettik jelidegi paraqshasynda.

Ilmek sózder: Praımerız Qazaqstan

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir