Nazarbaevty Qytaıǵa shaqyrdy

Nursultan Nazarbaev Qytaı Halyq Respýblıkasynyń syrtqy ister mınıstri Van Imen kezdesti, dep habarlady Elbasy resmı saıty.

Kezdesýde Nursultan Nazarbaev Qazaqstanda Qytaımen dostyqty joǵary baǵalaıtynyn atap ótti.

– Biz tatý kórshilik, dostyq jáne yntymaqtastyq týraly shartqa qol qoıdyq, shekara máselesin tolyq sheshtik. Bizdiń qarym-qatynasymyzda eshqandaı túıtkil bolǵan joq, ári qaraı da solaı jalǵasýy kerek. Qazaqstan Qytaıdyń biraz bastamalaryn qoldaıdy. Sonyń biri — "Bir beldeý, bir jol" baǵdarlamasynyń júzege asýy. Ony  Qytaı Tóraǵasy Sı Szınpın Qazaqstan jerinde jarııalaǵan bolatyn. Biz talaı sharýa atqardyq, áli de kóp jobalar boıynsha jumys júrgizilýde, – dedi Elbasy.

Qytaı Halyq Respýblıkasynyń syrtqy ister mınıstri Qazaqstannyń jetistikterine toqtalyp, Nursultan Nazarbaevqa eki el arasyndaǵy jan-jaqty qatynasty damytýǵa qosqan zor úlesi úshin alǵys aıtty. Van I Qazaqstan-Qytaı yntymaqtastyǵynyń ári qaraı da tereńdeı beretinine senim bildirdi.

– Jaqynda Qazaqstan óz táýelsizdiginiń 30 jyldyǵyn atap ótedi. Siz oǵan qol jetkizýdiń bastaýynda turdyńyz. Osy jyldar ishindegi Qazaqstannyń tabysty damýy bárimizdi tánti etedi. Osy jetistiktiń bárine Sizdiń arqańyzda qol jetkizildi. Sizdiń jetekshiligińizben Qazaqstan ósip-órkendedi. О́z elińiz úshin jáne bizdiń memleketterimizdiń arasyndaǵy tatý kórshilik qatynastardy damytý úshin biraz sharýa atqardyńyz. Qytaı halqynyń Siz sııaqty senimdi dosy bar. "Bir beldeý, bir jol" bastamasy dál osy jerde – Qazaqstannyń astanasynda bastaý alǵanyn eshqashan umytpaımyz, – dedi Van I.

Qytaı Halyq Respýblıkasynyń syrtqy ister mınıstri Nursultan Nazarbaevqa Qytaı Tóraǵasy Sı Szınpınniń aýyzsha ystyq sálemin jetkizdi. Onda Qytaı Tóraǵasy Elbasyny kez kelgen yńǵaıly ýaqytta Qytaıǵa saparmen kelýge shaqyrdy. Shanhaı Yntymaqtastyq Uıymyna múshe elderdiń syrtqy ister mınıstrleri keńesiniń ótken otyrysy týraly aıtyp berdi. Van I osy jyldar ishinde Qazaqstan Shanhaı Yntymaqtastyq Uıymyna eń belsendi qatysýshylardyń biri ǵana emes, sondaı-aq kóptegen ıdeıalarǵa, jobalar men baǵdarlamalarǵa bastamashy bolǵanyn atap ótti.

О́z kezeginde Qazaqstannyń Tuńǵysh Prezıdenti Qytaı Tóraǵasyna izgi tilegin joldady. Sondaı-aq ShYU jáne "Bir beldeý, bir jol" jobasynyń mańyzdylyǵy týraly pikirin bildirdi.

– Sı Szınpınge jyly lebizi úshin alǵysym sheksiz. Men ShYU qurylýynyń bastaýynda boldym. Uıymdy saqtaý jáne odan ári damytý kerek dep sanaımyn. Jahandanýǵa qater tónip turǵan qazirgi kezde ShYU jáne "Bir beldeý, bir jol" ıntegrasııa ıdeıasyn ustanatyn kóptegen halyqtar úshin tyǵyryqtan shyǵýdyń joly bolyp otyr, — dedi Nursultan Nazarbaev.