09 Qyrkúıek, 2020 NEWS

Májilis depýtaty oqýshylardyń qashyqtan bilim alýyna ashýlandy

Foto: qamshy.kz

Parlament májilisiniń jalpy otyrysynda depýtat Jámıla Nurmanbetova mektep oqýshylarynyń qashyqtyqtan bilim alýyna ashýlanyp, oqý jylyna sapasyz daıyndalǵany úshin sheneýnikterdi jaýapkershilikke tartýdy surady.

Ol qazirgi tańda sıfrlyq tehnologııalardy engizý qoljetimdi bilim alýǵa jaǵdaı jasaıtynyn atap ótti. Alaıda álemdik pandemııa kezinde qashyqtan oqýǵa kóshý eldegi bilim berý salasyndaǵy máselelerdi ashyq kórsetkenin atap aıtty.

– Kóptegen memlekettik baǵdarlamalardyń elektrondyq bilim berý resýrstaryna jáne de muǵalimderdi aqparattyq-kommýnıkatıvtik tehnologııalardy qoldanýǵa daıyndaýǵa qatysty túrli sharalar qarastyrylǵan. Osy sharalarǵa sońǵy 9 jylda memleketten 72 mlrd teńge bólindi. Onyń 30 mlrd ǵana e - learning elektrondy oqytý júıesin engizýge jumsaldy. Onyń ózinde bul baǵdarlama esh nátıje bergen joq, – dep Májilis depýtaty premer-Mınıstrdiń orynbasary Eraly Toǵjanovqa aıtty. 

 

Nurmanbetovanyń aıtýynsha, bilim jáne ǵylym mınıstrligi men sıfrlyq damý, ınnovasııa jáne aeroǵarysh ónerkásibi mınıstrligi  qashyqtan oqý úshin jeti ınternet-platforma qoldanysqa beriledi degenine qaramastan, 2020-2021 jyldaǵy qashyqtan oqý júıesiniń sapasy jaqsy emes. Onyń dáleli áleýmettik jelidegi ata-analardyń bildirgen narazylyqtary.

– Áleýmettik jelidegi ata-analardyń bildirgen narazylyqtaryna qarap, memleket basshylary qoldanysqa bergen ınternet platformalardyń sapasy nashar ekenin jáne qoldaný kezinde aqaýlyqtary jıá bolatyndyǵyn kóremiz. Interneti álsiz ári ornatylmaǵan aýyldardyń da baryn moıyndaýymyz kerek. Tipti qalanyń ózinde ár balada jeke kompıýteri joq. 55 myńnan astam oqýshy, 835 aýylda ınternet joq. Orta eseppen 1 mln-nan astam oqýshyda jeke kompıýterleri joq , – dedi ol.

Onyń aıtýynsha, qazirgi ýaqytta muǵalimderge úlken aýyrtpalyq túsýde. Olar sabaqty qashyqtan ótkizedi jáne odan bólek kezekshi synyptarǵa da sabaq ótedi.

– Ata-analarǵa da ońaı bolyp jatqan joq, olar ustazdyq qyzmetti óz moıyndaryna alýda. Odan bólek ata-ana jumysta otyryp nemese jumystan kelip WhatsApp arqyly kelgen tapsyrmalardy balalaryna túsindiredi. Bir kompıýterge qarap otyrǵan kópbalaly otbasylar da bar, tipti keıbir otbasylar da kompıýter joq. Olar sonda qandaı bilim alady? Alǵan bilimderiniń sapasy qandaı bolady, – dep depýtat narazylyǵyn bildirdi.

WhatsApp jáne teledıdardan berilip jatqan bilimniń sapasy keıin qandaı bolatynyn kim aıta alady? Sondaı-aq muǵalimderdiń qashyqtan oqytýǵa aldyn-ala daıyndyqtarynda máseleler bar. Qazir muǵalimder ózderine tıisti emes jumysty da jasaýda. Máselen olar ınternet platformalaryndaǵy aqaýlyqtardy ózderi jóndeýge májbúr, – dedi ol.

Odan bólek Jámıla Nurmanbetova mınıstrlikten qashyqtan oqýǵa baılanysty qajetti quraldar men mektepke berilý tıis kompıýterlerdi, ınternettiń qosylýyn, muǵalimderdiń daıyndyǵyn naqty durystap tekserýdi talap etti.

Sondaı-aq ol qashyqtan oqytýǵa qarjynyń qaıda ketip jatqandyǵyn tekserip, baqylaý qajettigin de atap aıtty. 

 

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir