"Qarjy qaıda ketti?". Depýtat bilim mınıstrliginiń jumysyn tekserý kerektigin aıtty

Parlament májilisiniń depýtaty Danııa Espaeva bilim jáne ǵylym mınıstrliginiń qarjylyq qyzmetin tekserý, qashyqtan oqytýdy uıymdastyrýǵa bólingen qarjynyń jumsalýyn tekserý máselesin kóterdi. Bul týraly ol májilistiń jalpy otyrysynda aıtty.

– Jazda bilim mınıstri Aımaǵambetov jańa oqý jylynda qashyqtan bilim berý jaǵynan qıyndyq bolmaıdy dep sendirgen. Alaıda "Aqjol" fraksııasynyń depýtattary óńirlerdi aralap shyqqannan keıin shilde aıynda mınıstrge taǵy úndeý joldap, jaǵdaıdyń túzelmegenin jetkizgen. Kópbalaly otbasylardyń balalary bir smartfonǵa talasyp, sabaq oqyp júr. Shalǵaı jatqan eldi mekender bylaı tursyn, tamyz aıynda Qaskeleń qalasynyń ata-analary ınternettiń joqtyǵyna shaǵymdanǵan. Olar Almaty qalasynan nebári 24 shaqyrym shalǵaı jerde turady. Jańa oqý jyly bastalǵan boıda áleýmettik jelilerde osy ispetti problemalar kóbeıip ketti. Sonda memleketten bólingen qarjy qaıda ketti?. 2016 jyldan beri bilim berý salasyna respýblıkalyq bıýdjetten shamamen 28 mıllıard teńgege transfertter bólindi. Sonyń ishinde 6 152 mektepke mýltımedııalyq qural-jabdyqtardy satyp alýǵa – 12 mıllıard teńge, 7 160 mektepti joǵary jyldamdyqty ınternetpen qamtamasyz etýge – 16,5 mıllıard teńge, budan bólek, sıfrlyq bilim berý resýrstaryna qosylý úshin qyrýar qarjy jumsaldy, – deıdi parlament májilisiniń depýtaty.

Depýtat mınıstrliktiń dúnıejúzilik bankten qaryz alǵanyn da, ol qarjyǵa qala men aýyl mektepteriniń deıgeıin teńestirý kózdelgenin, alaıda jumystyń bastalmaǵanyn atap ótti.

– 2017 jyly bilim jáne ǵylym mınıstrliginiń bastamasymen bankten 67,5 mıllıon teńge qaryzǵa alynǵan bolatyn. Jobanyń ataýy – "Orta bilimdi jańǵyrtý". Al negizgi maqsaty – qala men aýyl mektepteriniń bilim berý deńgeıin teńestirý. Osylaısha, 5 myń mektepti mýltımedııalyq qural-jabdyqtarmen qamtamasyz etýge sheshim qabyldandy. Aýyl mektepteriniń barlyǵyna kompıýterler men keńse tehnıkasy jetkiziledi degen jospar bolǵan. Al, eń bastysy, ınternet jyldamdyǵy baıaý mektepterge qosymsha symsyz baılanys quraldaryn ornatý kózdelgen.

Qolda bar málimetke sáıkes, osy jobanyń birde-bir baǵyty boıynsha konkýrs jarııalanǵan joq. Al kompıýterler men ınternet quraldaryn satyp alýǵa qatysty tehnıkalyq tapsyrma da ázirlenbepti. Soǵan qaramastan, Qazaqstan úsh jyl boıy qaryzdy rezervteý úshin komıssııany tólep keledi. Ol shamamen 160 myń dollar. Sebebi bilim jáne ǵylym mınıstrligi tıisti jumysty bastaǵan joq.

Dúnıejúzilik bankten alynǵan qarjy ıgerilmese de, shilde aıynda bilim jáne ǵylym mınıstrligi úkimetten qosymsha 74,2 mıllıard teńge suraǵan. Osy qarjyǵa mektepterdi onlaın sabaqtarǵa qajetti sıfrlyq tehnologııalarmen qamtamasyz etý josparlanǵan.