Tramptyń burynǵy zańgeri: Tramp qara násildiler basqaratyn elder "dárethana" dedi

AQSh prezıdentiniń burynǵy zańgeri Maıkl Koenniń sózine qaraǵanda, Donald Tramp ózin nisilshil mafııa sııaqty ustaıdy jáne "barlyq qara násildilerge pikiri nashar". Bul týraly BBC habarlady.

Bul aıyptaýlar Koenniń "Satqyndyq: estelik" kitabynan alynǵan. Ol kitabyn basqa da qylmystarmen qatar, Tramptyń saılaýaldy kampanııasyn qarjylandyrý erejelerin buzǵan qylmysy úshin jazasyn ótep jatqan kezde jazǵan.

Koenniń aıtýynsha, Tramp Nelson Mandela men ıspandyqtarǵa qatysty násilshil pikirler aıtqan.

Kitapta Koen ózin túrmege túsirgen "dál sol qylmystarǵa kináli" Tramp ekenin aıtyp  aıyptaıdy jáne burynǵy bastyǵyn "aldamshy, ótirikshi, alaıaq, buzaqy, násilshil, jyrtqysh, konman" dep ataıdy. Ol óziniń de buryn "tobyrlyq bastyq" mentalıtetine ıe bolǵanyn aıtty.

AQSh-tyń ár túrli aqparattyq agenttikteri seısenbide shyqqan kitaptan úzindiler jarııalady. 

Koen óziniń kitabynda Tramp "ádette, mýzykadan bastap mádenıetke jáne saıasatqa deıin qara násildiler úshin nashar pikirler bildirdi" dep jazdy.

Onyń sózinshe, Tramp Ońtústik Afrıkanyń burynǵy prezıdenti jáne aparteıdke qarsy belsendi Nelson Mandelany "kóshbasshy emes" degenin aıtty.

"Maǵan qara násildi adam basqaratyn bir eldi aıtyńyzshy. Bári de dárethana dedi Tramp myrza bir kezderi" dep jazǵan Koen.

"Bul sózder 2018 jyldan bastap Tramptyń Afrıka elderin "nájis" dep ataǵanyna uqsas aıyptaýlarmen úndes" deıdi BBC.

Degenmen, sol kezde AQSh prezıdenti jýrnalısterge "Men násilshil emespin. Sizge suhbat bergen eń  násilshil emes adammyn" dep jaýap bergen.

BBC aqparatyna sáıkes, násildik aıyptaýlar Tramptyń birinshi prezıdenttik merzimine kedergi keltirdi jáne respýblıkashyl prezıdenttiń qarasha aıynda óziniń demokratııalyq qarsylasy Djo Baıdenge qarsy qaıta saılaýǵa túsýine baılanysty másele bolyp qala berdi.

Koen kitapta Trampty ózinen burynǵy Barak Obamaǵa "jekkórýshilikpen qaraıdy" dep aıyptaıdy.

Koenniń aıtýynsha, Tramp birde "Men eshqashan ıspandyqtardyń daýysyn jınaı almaımyn. Qara násildiler sııaqty olar da Trampqa daýys bere almaıtyn aqymaq. Olar meniń adamdarym emes" degen.

Donald Tramptyń búkil prezıdenttik kezeńinde, ásirese saılaý naýqany kezinde meksıkalyqtardy birneshe ret masqaralaǵannan keıin, Latyn Amerıkalary týraly onyń pikirleri  muqııat baqylaýda boldy.

2019 jyly prezıdent Tramp Nıý-Meksıkoda ótken mıtıngide "Eshkim ıspandyqtardy budan artyq jaqsy kórmeıdi" degen.

Aq úı "Koen ótirik aıtady" deıdi

"Koen - bul kongresske ótirik aıtqan masqara qylmysker jáne qyzmetinen bosatylǵan advokat. Ol óziniń barlyq senimdiligin joǵaltty jáne onyń ótirikpen paıda tabýǵa degen sońǵy áreketin kórý tańqalarlyq emes" dedi Aq úıdiń baspasóz hatshysy Kaıleı MakEnanı demalys kúnderi jasaǵan málimdemesinde