Konstıtýsııanyń qoǵammen, zamanmen birge ózgerip otyrýy zańdylyq – Marat Báshimov

Konstıtýsııanyń zamanmen, qoǵammen birge damyp otyrýy zańdylyq. Bul týraly Ulttyq qoǵamdyq senim keńesiniń múshesi, Eýropalyq quqyq jáne adam quqyqtary ınstıtýtynyń dırektory Marat Báshimov aıtty.

Onyń aıtýynsha, qandaı jaǵdaıda da ol úshin eń aldymen, adam ómiri men bostandyǵy basty qundylyq bolyp qala beredi.

"Eýropa Odaǵy, Eýropa Keńesi men BUU halyqaralyq sarapshylary bizdiń Konstıtýsııanyń normalary adam quqyqtary týraly barlyq sharttarǵa sáıkes keledi dep baǵa bergen bolatyn. Qazirgi kúni qoǵamda oryn alyp jatqandaı jaǵdaılarǵa qarap, Ata Zańymyzdyń «Qazaqstan Respýblıkasy ózin demokratııalyq, zaıyrly, quqyqtyq jáne áleýmettik memleket retinde ornyqtyrady, onyń eń qymbat qazynasy - adam jáne adamnyń ómiri, quqyqtary men bostandyqtary.memleket adamnyń ómir súrýi men densaýlyǵyna qolaıly aınaladaǵy ortany qorǵaýdy maqsat etip qoıady», dep jazylǵan 1-baby men «Adamdardyń ómiri men densaýlyǵyna qater tóndiretin derekter men jaǵdaıattardy laýazymdy adamdardyń jasyrýy zańǵa sáıkes jaýapkershilikke ákep soǵady» ,- delingen 31-baby óte ózekti bolyp otyrǵanyn jáne memleket osy tujyrymdamany basshylyqqa alǵanan baıqaýǵa bolady", - deıdi Marat Báshimov.

Sondaı-aq zańger Ata Zańymyzdyń qalyptasýyna Elbasy Nursultan Nazarbaevtyń qosqan úlesi zor ekenin de atap ótti. Ol jumys tobynyń aldyna áldekimniń konstıtýsııasyn qur kóshire salmaı, kerisinshe basqa elderdiń tájirıbesin taldaý negizinde qazaq eliniń talaptaryna barynsha jaýap bere alatyn negizgi zań jobasyn daıyndaý kerektigin únemi el esine salyp otyrǵan.

"Konstıtýsııanyń barlyq erejelerinen bizdiń erekshe qazaqstandyq qoltańbamyz, bizdiń halqymyzdyń óresi men dástúrlerine jáne bolashaqtaǵy perspektıvasyna sáıkesetin óz bolmysymyz baıqalady. Konstıtýsııanyń sońǵy mátinine qoǵamdyq kelisim, saıası turaqtylyq, búkil halyqtyń ıgiligi jolyndaǵy ekonomıkalyq damý, qazaqstandyq patrıotızm, memlekettik ómirdegi barynsha mańyzdy máselelerdi demokratııalyq tásildermen sheshý sııaqty Qazaqstan Respýblıkasynyń bazalyq prınsıpteri qosyldy", - deıdi ol.