B. Saǵyntaev AMSK qyzmetiniń indettiń jańa tolqynyna daıyndyǵyn tekserdi

Almaty ákimi Baqytjan Saǵyntaev №17-shi qalalyq emhanada bolyp, alǵashqy medısınalyq-sanıtarlyq kómektiń KVI indetiniń jańa tolqyny jaǵdaıyna qalaı beıimdeletinin tekserdi.

№17-shi emhanada taza jáne kir aýmaqtar arnaıy bólingen, fıltrler men baqylaý postylary ornatylǵan. Naýqastar aǵyny daralanǵan, ıaǵnı emdelýge jatqyzylatyn nemese tekserýden ótetin JRVI belgileri bar syrqattar, balalar, júkti áıelder ózara aralaspaıdy. Burynǵydaı dálizde birge turmaıdy. Olar úshin jeke prosedýralyq jáne zerthanalyq kabınetter, kireti, shyǵatyn oryndar uıymdastyrylǵan. Maqsat – vırýstyń aýrýhana ishinde taralýyna jáne qyzmetkerlerdiń vırýsty juqtyrýyna jol bermeý.

№17-shi emhanaǵa Bostandyq aýdanynyń 82 myń turǵyny tirkelgen. Olardyń 28 myńǵa jýyǵy sozylmaly aýrýlary bolǵandyqtan dıspanserlik esepte turǵandar, bulardyń arasynda qan qysymyna, qant dıabetine, júrektiń ıshemııalyq aýrýyna shaldyqqan naýqastar bar.

Almaty ákimi B. Saǵyntaev «qaýipti toptaǵylarǵa» jete nazar aýdarýdy tapsyrdy, óıtkeni olar KVI juqtyratyn bolsa, jaǵdaılary nasharlap, syrqattyń asqynýy múmkin.

Qalanyń barlyq emhanalary basshylaryna PIK-termen qosa qajetti aqparat jazylǵan nusqaýlyqtardy taratý tapsyryldy, munda JRVI belgileri paıda bolǵan kezde kimderge júginý kerektigi kórsetilgen.

Búgingi kúni quramynda emhanalardyń 40 mamany bar 16 mobıldi top ambýlatorııalyq em alyp jatqan naýqastardyń jaǵdaılaryn baqylaýda. Qazirgi kezde KVI-den saýyǵyp shyqqan 8 adam, syrqaty jeńil bireý jáne 18 sımptomsyz naýqas esepte tur.

Jalpy, qalada AMSK 74 uıymy jumys jasaıdy, olardyń 39-y memlekettik, bularǵa shamamen 1,7 mln adam tirkelgen. Al 35 jeke uıymdarǵa tirkelgeni 340 myń adamǵa jýyq. Indet sharyqtaǵakn kezde, 15 maýsymnan 15 shilde aralyǵynda 2450 vırýs juqtyrýshy úıde, dárigerlerdiń baqylaýynda em aldy. Qazir bulardyń sany 825 naýqas. Quramynda 925 dáriger bar 300 mobıldi toptar quryldy. Indettiń jańa tolqynyna daıyndyq barysynda bul resýrstar eki esege artatyn bolady. Mindet – KVI boıynsha epıdemıologııalyq ahýal órshıtin bolsa, shynaıy naýqastar men vırýs juqtyrýshylardydyń basym bóligin zamanaýı medısınalyq kómekpen keńinen qamtý. Almatynyń barlyq densaýlyq júıesi osyǵan baǵyttalǵan.