"Problemalar boldy". Mınıstr oqýlyqtardyń sapasy jaıly aıtty

Bilim jáne ǵylym mınıstri Ashat Aımaǵambetov oqýlyqtaǵy olqylyqtar týraly oqýlyqtardyń sapasy jaıly ótken onlaın jınalysta habarlady.

– Oqýlyqtarda buǵan deıin problemalar boldy. Mysaly, biz oqýlyqtardy daıyndaǵanda, onyń mazmunynda balalarǵa úı jumysyn jasaý úshin ınternettiń siltemesin jiberip, «endi osy siltemeni ash ta, úı jumysyn jasa» deıdi. Alaıda barlyq balada bul múmkindik bolmady ǵoı. Aýyldaǵy balalar bar, qaladaǵy balalar bar, ártúrli jaǵdaıdaǵy balalar bar. Sondyqtan úı jumysyn mindettep, ınternet arqyly ǵana oqı alatyn úı jumysy bolsa, bala ony qalaı isteıdi?! Osyndaı kemshilikter múldem bolmaýy kerek.

Balanyń jasyna, memlekettik til saıasatyna saı ádistemelik turǵyda oqýlyqtar durys bolýy kerek. Elektrondyq oqýlyqtar týraly da másele óte mańyzdy. Ol qoljetimdi bolýy kerek. Sonymen qatar, olardyń tegin bolý suraǵy da basty nazarda, – dedi mınıstr.

Ol tarıh jáne ádebıet oqýlyqtarynyń olqylyqtaryn atap ótti.

– Biraz máselelerge kóńilimizdi salyp qaraýymyz kerek. Birinshiden, tarıh oqýlyǵy boıynsha qazir tıisti jumys qarastyrylyp jatyr. Qazaqstan tarıhy boıynsha ortaq oqýlyq bolýy kerek. О́ıtkeni táýelsiz Qazaqstannyń tarıhy bolǵandyqtan, oǵan ortaq baǵdarlama boıynsha ortaq oqýlyq bolýy kerek degen usynys bar. Usynysty qarastyryp, tıisti jumysty júrgizip jatyrmyz.

Ekinshiden, kórkem ádebıet boıynsha zııatker, daryndy, HHI ǵasyrdyń oqýshysyn qalyptastyramyz desek, balalardyń ádebıetti oqıtyndaı múmkindigi bolýy kerek. Oǵan biz baýlýymyz kerek. Alaıda "Bizdiń naryqta balaǵa qajet ádebıet jetkilikti me?" degen suraq paıda bolady. Onymen qosa, mektep kitaphanalarynyń jaǵdaıy qalaı? Olarǵa kórkem ádebıet kitaptary jetkilikti túrde satyp alynyp otyr ma, joq pa? Jetkilikti me? Onyń jumys isteıtin formaty qandaı? Bul suraqtar óte mańyzdy. Kórkem ádebıetti mektepterge alyp berý jaǵdaıy, onyń jetkilikti bolýy, dúnıejúzilik ádebıette tanylǵan ádebıetterdiń qazaq tilindi qoljetimdi bolýy – búgingi kúnniń basty suraqtarynyń biri.

Qazaq ádebıeti oqýlyqtarynyń mazmuny, baǵdarlamasy boıynsha da biraz suraq qoıylyp jatyr. "Biraz klassık baǵdarlamaǵa enbeı qalǵan" degen suraqtar, ótinish hattar túsip jatyr. Sondyqtan osy másele boıynsha jumys tobyn quryp, tıisti jumysty uıymdastyrylady, – dedi Aımaǵambetov.