02 Qyrkúıek, 2020 Aqtóbe oblysy
Nur Otan praımerızine Aqtóbeden 486 adam tirkeldi
Partııaishilik saılaýǵa úmitkerlerdi tirkeý merzimi aıaqtalyp, qorytyndysy jarııalanǵan bolatyn. Aqtóbeden 486 adam baq synaýǵa bel býyp otyr. Bul týraly «Nur Otan» partııasy Aqtóbe oblystyq fılıaly tóraǵasynyń birinshi orynbasary Erbol Danaǵulov brıfıngte aıtty.
Erbol Danaǵulov
Onyń aıtýynsha, tirkelgen úmitkerlerdiń 35,8 paıyzy (174-i) - áıelder, 29 paıyzy (141) – 35 jasqa deıingi jastar. Bastaýysh partııa uıymdarynan 221 azamat usynylsa, ózin-ózi usynýshylar – 265 adam. Praımerızge qatysýǵa Aqtóbe qalasy, Muǵaljar, Hromtaý, Shalqar, Alǵa aýdandary erekshe belsendilik tanytqan.
Erbol Danaǵulov aqtóbelikterdi aldaǵy ýaqytta atqarylatyn jumystarmen tanystyryp, josparlarymen bólisti. Úmitkerler 31 tamyzdan 6 qyrkúıekke deıin úgit-nasıhat naýqanyna daıyndalyp, 7 qyrkúıekten bastap úgit júrgizýge kirisedi. Onyń ishinde 25 jerde jarııa pikirsaıystar ótkizý qarastyrylǵan. Oǵan qatysý barlyq úmitkerlerge mindetti.
-Úmitkerler birinshi kezeńde naqty eldi mekenderdiń máselelerin sheshý boıynsha óz kózqarasyn tanystyrady. Iаǵnı jergilikti jerlerdegi ózekti máselelerdi ashyq kóterip, naqty sheshimder usynýy tıis. Ekinshi kezeńde «suraq-jaýap» formatynda pikirsaıys sessııasy ótedi. Pikirsaıystardyń jalpy uzaqtyǵy 90 mınýttan aspaıdy, -dep Erbol Danaǵulov jarııa pikirsaıystardy ótkizý tártibin aıtyp ótti.
Partııaishilik saılaýda adamdardyń qaýipsizdigi basty orynǵa qoıylǵan. Úmitkerlerdiń jarııa pikirsaıystary, partııa múshelerimen kezdesýleri kem degende 2 metr araqashyqtyqty saqtaı otyryp ótedi. Sondaı-aq kezdesýlerdi kóbine ashyq alańda, al pikirsaıystardy onlaın formatta uıymdastyrý qarastyrylǵan.
1-3 qazan aralyǵynda oblystaǵy 33 myńnan astam partııa múshesiniń daýys berýi úshin 136 daýys berý ýchaskeleri belgilenipti. Onyń ınternet baılanysyna qosylmaǵan 42 ýchastokta dástúrli bıýlletenmen, 94 ýchastokta onlaın daýys berý josparlanyp otyr.
- Búginnen bastap úmitkerlermen kezdesý uıymdastyryp, úgit-nasıhat jumystary týraly jan-jaqty aqparat berýdi bastadyq. Úmitkerlerimiz shetinen bilimdi, belsendi, óz kúshine senimdi. Bastysy elimizdiń damýyna múddeli. Biz olarǵa teń múmkindik berip, adal, ashyq túrde baq synaýlaryna bar jaǵdaıdy jasaımyz, - dedi Erbol Danaǵulov.
Aıta ketý kerek, partııaishilik saılaýǵa elimiz boıynsha 10 990 adam tirkeldi.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir