Almaty qalasynyń ákimi Baqytjan Saǵyntaev almatylyqtarǵa qazirgi epıdemıologııalyq ahýal jáne COVID-19-ben kúresý sharalary týraly aıtyp berdi

«Almaty» TK Akimat Live baǵdarlamasy efırinde qala ákimi B. Saǵyntaev koronavırýstyq ınfeksııanyń taralýyna jol bermeý jónindegi ózekti suraqtarǵa jaýap berdi.

Aǵymdaǵy jyldyń 5 tamyzyndaǵy jaǵdaı boıynsha Almatyda COVID-19-tiń 12641 jaǵdaıy tirkeldi. Táýlik ishinde 176 jańa jaǵdaı anyqtaldy. Barlyǵy 7590 adam emdelip shyqty, bul naýqastardyń 60%-yn quraıdy. Táýlik ishinde 504 adam emdelip shyqty. Osy ýaqyt ishinde alǵash ret oń úrdis baıqaldy, onda saýyǵyp shyqqandardyń sany aýrýhanada jatqandardyń sanynan 3,3 ese artyq.

Barlyq deńgeıdegi dárigerlerdiń úılesimdi jumysynyń arqasynda júzden astam naýqastyń jaǵdaıy turaqtalyp, olar jansaqtaý bóliminen palatalarǵa aýystyryldy.

Vırýsty jedel juqtyrýshylardy anyqtaý úshin Almaty qalasynyń ákimi búgingi kúni zertteý jumystarynyń qarqyndy júrgizilgendigin, zerthanalardyń qýattylyǵy 2,5 myńnan 9,5 myńǵa deıin artqanyn, zertteý kóleminiń kúnine 19,5 myńǵa deıin ulǵaıǵanyn atap ótti.

Búgingi kúni shamamen 435 myń zertteý júrgizildi. Iаǵnı, qala turǵyndarynyń shamamen 15-17%-y synaqtan ótti. 100 myń turǵynǵa shaqqanda bul Eýropa elderinde ótkizilgen testileý deńgeıine saı.

«Biz úshin medısına uıymdaryna túsetin júktemeniń naqtyly kórinisin kórý mańyzdy. Iаǵnı, dári-dármekterdiń qajetti qoryn qurý, dárigerlerge túsetin júktemeni esepteý jáne t.b. Bul kórsetkishter barynsha naqty bolsa, KVI-men kúrestiń pármendiligi artady», — dep atap ótti B. Saǵyntaev.

Osyǵan baılanysty, 2 kópsalaly aýrýhanalar birtindep qalypty jumys rejımine oralýda, bular №4 jáne №7 qalalyq klınıkalyq aýrýhanalar.

Sonymen qatar, pandemııanyń jańa tolqynyna daıyndyq aıasynda aýyr naýqastar úshin birinshi eshelondaǵy ınfeksııalyq stasıonarlardaǵy tósek-oryndardyń qýattylyǵy 1015-ke ulǵaıady. Sondaı-aq, tamyz aıynyń sońynda 500 oryndy jańa aýrýhana iske qosylady. Qyrkúıek aıynyń ortasyna deıin – 300 oryndy jedel salynatyn juqpaly naýqastar aýrýhanasy, jeke ınvestısııalar esebinen 1 qazanǵa deıin eki qonaqúı bazasynda 215 oryndy tolyqqandy kovıdti klınıkalar iske qosylady.

Qalalyqtardyń suraqtaryna jaýap bere otyryp, B. Saǵyntaev stasıonarlardy ortalyqtandyrylǵan medısınalyq gazben qamtamasyz etý týraly aıtty. Al bul 1500 tósek-oryn.

Budan ózge, barlyq kovıdti aýrýhanalarda B jáne V synyptaǵy medısınalyq qaldyqtardy joıý, sonymen qatar toqtaý sýlardy zalalsyzdandyrý júıeleri boıynsha zamanaýı termınaldar salý josparlanǵan.

Sonymen birge, qajetti medısınalyq quraldarmen jabdyqtaý jumystary júrgizilýde. Jyl basynan beri 10,5 myńnan astam apparat satyp alyndy, onyń ishinde 252 О́JJ apparaty, 1050 ottegi konsentraty, 5 KT, 33 rentgen qondyrǵysy. Tamyz aıynyń aıaǵynda jergilikti bıýdjettiń esebinen qosymsha 1050 dana ottegi konsentraty jetkiziledi. Qyrkúıektiń ortasyna deıin – 379 О́JJ apparaty.

Qala ákimi ózin-ózi oqshaýlaý rejımin buzýshy sımptomsyz vırýs juqtyrýshylarǵa qoldanylǵan sharalarǵa jeke toqtaldy. 2020 jyldyń 3 tamyzynan bastap Almaty qalasynda COVID-19 koronavırýs ınfeksııasy taralýyn boldyrmaý úshin qosymsha shekteý sharalary engizildi. Bul KVI dıagnozy rastalǵan adamdardyń ózin-ózi oqshaýlaý sharalary.

Eger PTR-testileýdiń oń nátıjesi anyqtalǵan jaǵdaıda, naýqas adamǵa belgilengen erejelerdi saqtaý týraly habarlama jiberiledi. Oǵan úı karantıni erejelerin buzǵan jaǵdaıda jaýapkershilikke tartylatyny (ákimshilik aıyppuldy qosa) eskertiledi.

Búgingi tańda KVI-di juqtyrǵan 8 sımptomsyz naýqas arnaıy stasıonarǵa oqshaýlandy. 30 AEK kóleminde aıyppul salyndy. Eger olar ózgelerge aýrý juqtyratyn bolsa, onda qylmystyq jaýapkershilikke tartylýy mumkin.

Almaty ákimi B. Saǵyntaev KVI-men kúresýge yqpal etetin sıfrlyq sheshimder týraly habarlady. Mysaly, qoǵamdyq kólikterde «maska rejıminiń» yqtımal buzýshylaryn anyqtaıtyn júıe synaqtan ótkizilýde, bul jolaýshylar arasyndaǵy áleýmettik qashyqtyqtyń saqtalýyn anyqtaýǵa múmkindik beredi. Sonymen birge dárihanalarda dári-dármekterdiń qansha qalǵandyǵyn anyqtaıtyn qosymsha ázirlendi.