"Qarajatty ysyrap etip otyrmyz". Prezıdent joldaýy

Búgin Qazaqstan prezıdenti Qasym-Jomart Toqaev parlamenttiń 6-sessııasynda qazaqstandyqtarǵa jasaǵan joldaýynda ónerkásipke qoldaý kórsetýdi aıtty. 

– Qazaqstannyń aldynda turǵan asa mańyzdy mindet – ónerkásiptik áleýetimizdi tolyq paıdalaný. Osy saladaǵy tabystarymyzǵa qaramastan, ishki naryqtyń zor múmkindikterin áli de bolsa tolyqqandy júzege asyra almaı kelemiz. О́ńdelgen taýarlardyń úshten ekisine jýyǵy shetelden ákelinedi. Ulttyq ekonomıkanyń strategııalyq qýatyn arttyrý úshin tez arada qaıta óńdeý isiniń jańa salalaryn damytý qajet. Bul qara jáne tústi metallýrgııa, munaı hımııasy, kólik qurastyrý jáne mashına jasaý, qurylys materıaldary men azyq-túlik óndirý jáne basqa da salalardy qamtıdy. Sapalyq turǵydan múlde jańa ulttyq ındýstrııany damytý úshin jańǵyrtylǵan zańnamalyq negiz qajet. О́nerkásipti retteý jáne oǵan qoldaý kórsetý máseleleri túrli zańnamalyq aktilerde kórinis tapqan. Biraq, ortaq maqsat kórsetilmegen, júzege asyrylatyn saıasat pen sharalardyń arasynda ózara baılanys joq, – dedi prezıdent.

Sondaı-aq, ol jekelegen sektorlardy nemese salalardy retteıtin kóptegen zań baryn atap ótti.

– Mysaly, «Elektr energetıkasy týraly» zań, «Kólik týraly» zań. О́ńdeý ónerkásibin damytýdyń qaǵıdattaryn, maqsattary men mindetterin belgileıtin «О́nerkásip saıasaty týraly» birizdi zań jyl sońyna deıin ázirlenýge tıis.     О́nerkásipke qoldaý kórsetýdiń naqty sharalaryn da jetildirý kerek. Bizde júıeli ári birtutas ustanym joq. Sonyń saldarynan sansyz kóp jobaǵa qarajatty ysyrap etip otyrmyz, – deıdi Prezıdent.