Memlekettik hatshy Abaı aýdanyndaǵy qaıta jóndeýden ótken tarıhı nysandarmen tanysty

QR Memlekettik hatshysy Qyrymbek Kósherbaev bastap kelgen Abaıdyń 175 jyldyq mereıtoıyn daıyndaý jáne ótkizý jónindegi memlekettik komıssııa músheleri Syrt-Qasqabulaq pen  Aqshoqy, Jıdebaıdaǵy nysandardy aralady.

1845 jyly Syrt-Qasqabulaqtyń tóńireginde uly qazaq aqyny, aǵartýshy Abaı Qunanbaev dúnıege kelgen. Aqynnyń kindik qany tamǵan jerde eskertkish turǵyzyldy. 2005 jyly tastan turǵyzylǵan belgide: «Bul  jerde  aǵa  sultan  Qunanbaı  aýylynda  1845 jyly  qazaqtyń  danyshpan  aqyny  Abaı (Ibrahım)  dúnıege  kelgen» dep jazylǵan. О́tken jyly Syrt-Qasqabulaqtyń jolyna aǵymdaǵy jóndeý jumystary júrgizildi. Qasıetti bulaq mańy abattandyrylyp, saıabaq jóndeldi. О́ıtkeni bul osy óńirge kelgen qonaqtar úshin «Abaı joly».

QR Memlekettik hatshysy Qyrymbek Kósherbaev bastap kelgen delegasııa músheleri aýmaqtyń abattandyrylýy tarıhı orynǵa erekshe kórik berip turǵanyn atap ótti.

Abaıdyń ákesi jerlengen Aqshoqyda Qunanbaı О́skenbaıulyna arnalǵan mýzeı salyndy. Aıta keteıik, munda kórme zalynan bólek, oqýshylarǵa arnalǵan sabaqtar men konferensııalar ótkizýge bolatyn zal qarastyrylǵan. Qunanbaı áýletiniń zıraty jóndelip, abattandyryldy.

Memlekettik komıssııa músheleri mýzeıden keıin Qaraýylǵa bet burdy. Munda Abaıdyń 175 jyldyǵyna oraı 300 oryndyq mektep salyndy. Oqý ordasy Nazarbaev ıntellektýaldyq mektebiniń standarty boıynsha barlyq zamanaýı talaptarǵa sáıkes jabdyqtalǵan.

QR Memlekettik hatshysy, Abaıdyń 175 jyldyq mereıtoıyn daıyndaý jáne ótkizý jónindegi komıssııanyń tóraǵasy Qyrymbek Kósherbaev qaladaǵy mektepten kem túspeıtin bilim oshaǵyn aýylda ashqan aımaq basshysy Danıal Ahmetovke alǵysyn bildirdi.

– Bul mektepte mende qýana-qýana bilim alatyn edim. Mundaı oqý ordalary básekege qabiletti jáne kóp tildi meńgergen balalardy daıyndap shyǵarady. Mektepte mýltımedııalyq klasstar men jýrnalısterge arnalǵan synyptar bar. Tipti astanalyq mektepter bulaı maqtana almaıdy. Abaıdyń Otanynda osyndaı mekteptiń ashylǵany qýantady, - dedi Qyrymbek Kósherbaev.

Budan soń delegasııa músheleri Jıdebaıdaǵy Qunanbaı áýletiniń kezindegi úıine bardy. Bul aýmaqta qazir Abaı atyndaǵy ádebı-memorıaldyq mýzeı ornalasqan.

Abaı ómiriniń sońǵy 10 jyly Jıdebaıda ótken. Munda aqyn 76 lırıkalyq óleń men qarasózderin jazdy. Osy aýmaqta Abaı úı-mýzeıi, Zere men Uljannyń, sondaı-aq Kengirbaı bıdiń kesenesi, Abaıdyń aǵasy Qudaıberdi men Abaıdyń áıeli Erkejannyń zıraty ornalasqan. Budan bólek Ospankól bar. Sonymen qatar Sháýkenbaı men Ǵabıthannyń da zıraty osy mańda.

Jıdebaıdaǵy úı-mýzeıde aqyn ómirinen syr shertetin jádigerlerdi tamashalaýǵa bolady. Delegasııa músheleri «Abaı-Shákárim» memorıaldyq kesheniniń sáýlettik qurylysyna oń baǵalaryn berdi.

– Mádenıet jáne sport mınıstrligi men Shyǵys Qazaqstan oblysynyń ákimdigine alǵysymdy bildirgim keledi. Munda atqarylǵan jumys barysyna atsalysqan jandarǵa qarap, qalaı eńbektengenderin baıqaýǵa bolady. Biz búgin uly oıshylmen baılanystaǵy barlyq tarıhı orynǵa baryp qaıttyq. Bul respýblıkamyzdyń týrıstik kartasyna engiziledi. Munda qazaqstandyq týrısterden bólek, sheteldikter de keletin bolady. Barlyq nysannyń tehnologııalyq quraldarmen qamtamasyz etilýi qýantady. Bul keleshek urpaqtyń mádenı murany meńgerýine septigin tıgizedi, - dep qortyndylady Qyrymbek Kósherbaev.