29 Tamyz, 2020 NEWS

Toqaev qazaqstandyqtarǵa úndeý joldady

Foto: akorda.kz

Prezıdent Qasym-Jomart Toqaev Semeı ıadrolyq polıgonynyń jabylǵan kúnine baılanysty qazaqstandyqtarǵa úndeý joldady.

"Qurmetti otandastar!

Osydan týra 29 jyl buryn, 29 tamyzda Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaev ıadrolyq qarý-jaraqtan bas tartý týraly teńdessiz tarıhı sheshim qabyldap, antııadrolyq qozǵalystyń kóshbasshylarynyń biri boldy. Birikken Ulttar Uıymynyń qaýlysymen 29 tamyz Halyqaralyq ıadrolyq synaqtarǵa qarsy is-qımyl kúni dep jarııalandy.

Osylaısha, 450-den astam jarylys jasalǵan álemdegi eń iri ıadrolyq synaq alańynyń biri – Semeı polıgony, burynǵy Keńes Odaǵy basshylyǵynyń qarsylyǵyna qaramastan, birjola jabyldy. Bul óskeleń urpaqtyń jarqyn keleshegi men memleketimizdiń baıandy bolashaǵy jolynda jasalǵan sheshýshi qadam boldy. Sonymen qatar álemniń ár túkpirindegi synaq alańdarynyń jabylýyna jol ashqan batyl bastamaǵa aınaldy.

Táýelsizdikti ıadrolyq qarýsyzdaný jáne joıqyn qarýdy taratpaý jónindegi beıbit ustanymmen qarsy alýymyz Elbasynyń saıası erik-jigeri men salıqaly saıasatynyń arqasynda júzege asqany anyq.

Elbasy Nursultan Ábishuly Nazarbaev tarıhta tuńǵysh ret ıadrolyq polıgondy óz erkimen jabý jóninde parasatty sheshim qabyldaýy arqyly álemdegi qaýipsizdikti jáne beıbitshilikti qamtamasyz etýge zor úles qosty.

Osy batyl áreket álem tarıhynda jarqyn bet retinde máńgi qalatynyna kúmánim joq.

Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń Semeı ıadrolyq polıgonyn jabý týraly jáne jahandyq qaýipsizdik jónindegi basqa da bastamalary beıbitshilikke degen berik ustanymymyzdy aıqyndap berdi.

Elbasynyń kóregen basshylyǵymen memleketti joıqyn qarýsyz damytýdyń álemdik biregeı úlgisi qalyptasty. Elimiz ıadrolyq qaýipsizdik salasyndaǵy halyqaralyq qozǵalystyń belsendi múshesine aınaldy.

Táýelsizdiktiń 30 jyldyǵy qarsańynda Qazaqstan Respýblıkasy halyqaralyq qaýipsizdikti nyǵaıtý, memleketter arasyndaǵy yntymaqtastyqty damytý, jahandyq qaqtyǵystardy beıbit jolmen sheshý isine belsene atsalysa beredi dep senimmen aıta alamyn." delingen memleket basshysynyń úndeýinde.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir