Kásipkerdi aldamaq bolǵan eki polıseıdiń áreketi áshkere boldy (vıdeo)

Kásipkerdi qaqpanyna túsirmek bolǵan eki polıseıdiń masqarasy shyqty. Bul týraly KTK habarlady.

Tártip saqshylary aldyn ala aqyldasyp maskúnem arqyly "ruqsat etilmegen ýaqytta araq sattyń" dep dúken satýshysyna aıyppul arqalatpaq bolǵan. Alaıda aılasyn júzege asyraı almaǵan polıseılerdiń basy daýǵa qaldy.

Qýlyq jasap turǵan jerinen beınebaqylaý kamerasyna túsip qalǵan polısııa qyzmetkerlerin endi Ishki ister mınıstrligi izdestirip jatyr.

– Osyndaıdyń keregi ne?! Aramzalyq, masqara ǵoı! Eger mende kamera bolmasa,  aıyppul salyp ketetin edi. Sotta da ony dáleldeı almaısyń. Bular sóıtedi de, hattama toltyryp, maǵan aıyppul salyp ketetin edi. Bizdiń ne jazyǵymyz bar? Bala-shaǵamyzdy asyrap otyrmyz, – deıdi dúken qyzmetkeri.

Taspada kórinip turǵandaı, avtoturaqqa toqtaǵan kólikterdiń birinen qolynda sómkesi bar qańǵybas erkek túsedi. Sodan dúkenge kirip araq suraıdy. Alaıda áli tańǵy ýaqyt bolǵandyqtan, satýshy oǵan araq satpaıdy. Biraz turǵan soń, maskúnem dalaǵa shyǵyp ketedi. Osy ýaqytta qańǵybas túsken kólikten eki polıseı de shyǵady. Biri toqtap, qańǵybaspen sóılesip turady. Al ekinshisi aınalyp baryp, birden dúkenge kiredi. Artynsha qalǵan ekeýi kiredi.

Kásipkerdiń aıtýynsha, birinshi kirgen polıseı birden "ruqsat etilmegen ýaqytta araq sattyń" dep, dúken ıesin qyspaqqa ala bastapty. Sómkesinde jatqan araqty kórsetip, maskúnem de saqshynyń sózin rastaıdy. Alaıda dúken ishinde de kamera ornatqan kásipker óziniń araq satpaǵanyn kórsetip qutylady.

Aılasy aspaı qalǵanyna kózi jetken ekeýi maskúnemdi ertip, qaıtadan bir kólikke minip ketedi. Bul jaǵdaı úsh kún buryn bolǵan eken. Kásipkerdi qaqpanǵa túsirmek bolyp masqarasy shyqqan qyzmetkerleriniń kim ekenin Ishki ister mınıstrligindegiler anyqtap jatyr.