Nur-Sultan qalasynda "Agrarlyq salany damytý – ortaq múddemiz" birlesken otyrysynda "Aýyl" partııasy men "Qazaqstan fermerleri qaýymdastyǵy" yntymaqtastyq memorandýmyn bekitti. 

Qujatqa "Aýyl" Halyqtyq-demokratııalyq patrıottyq partııasynyń tóraǵasy Álı Bektaev pen "Qazaqstan fermerleri qaýymdastyǵy" respýblıkalyq qoǵamdyq birlestiginiń basqarma tóraǵasy Jıgýlı Daırabaev qol qoıdy.

Memorandým aıasynda taraptar agroónerkásip keshenin damytýǵa, aýyl sharýashylyǵy salasy men aýyl eńbekkerleriniń ózekti máselelerin sheshýge, aýyl sharýashylyǵy taýar óndirýshileri men agroónerkásiptik keshenniń basqa da qatysýshylaryna memlekettik jáne memlekettik emes qoldaý júıesin jetildirýge járdemdesýge baǵyttalǵan birlesken is-sharalardy ótkizý týraly kelisimge keldi.

"Qazaqstan fermerleri qaýymdastyǵy" - Qazaqstannyń barlyq oblystarynyń 40 myńnan astam fermerin biriktiretin iri qoǵamdyq uıymdardyń biri. Atalmysh qoǵamdyq birlestikpen ortaq múddelerimiz kóp. Buǵan deıin de respýblıkalyq jáne aımaqtyq deńgeıde áriptestik qarym-qatynasta boldyq. Ásirese aýyl sharýashylyǵy salasynyń damýyna qatysty máselelerde qaýymdastyq pen partııanyń ustanǵan baǵytynyń ortaq ekenine kóz jetkizdik. Búgingi yntymaqtastyq memorandýmy arqyly "Aýyl partııasynyń" áleýeti artyp, aýyl sharýashylyǵynyń damýyna qosar úlesimiz eselene túsedi dep úmittenemin", - dedi "Aýyl" partııasynyń tóraǵasy Álı Bektaev.

Onyń aıtýynsha, álemdi jaılaǵan koronavırýs indeti agrarlyq sektordyń, azyq-túlik qaýipsizdiginiń mańyzdylyǵyn aıqyndap berdi.

"Dál qazir adamǵa qymbat kóliktiń de, qymbat kıimniń de keregi joq. Eń negizgisi – denniń saýlyǵy. Eldi etpen de, sútpen de, nanmen de qamtamasyz etip otyrǵan sol aýyldyń berekeli tirligi, eren eńbegi. Otyz jyldyń ishinde ekonomıkamyzdyń shıkizatqa táýeldilik qursaýynan shyǵa almaı qalǵany jasyryn emes. Basqasyn aıtpaǵanda, Qazaqstannyń aýylsharýashylyq óndiris keshenin damytýǵa áleýeti jetkilikti. Mal baǵyp, jer emgen ata kásibimizdi qaıta jańǵyrtyp, óńdeý ónerkásibin dereý jandandyrýymyz qajet", - dedi partııa tóraǵasy.

О́z kezeginde "Qazaqstan fermerleri qaýymdastyǵy" RBK basqarma tóraǵasy Jıgýlı Daırabaev:

"Búginde elimizdegi árbir aýdanda fermerler qaýymdastyǵy jumys isteıdi. Negizgi maqsatymyz – aýyl áleýetin kóterý. Meniń aıtaıyn degenim, sońǵy jyldary "Keleshegi joq aýyldar" degen halyqqa jaǵymsyz sheshim qabyldandy. Keıbir derekterge súıensek, 1100 aýyl keleshegi joq degen jeleýmen ońtaılanyp, iri aýyldarǵa, qalaǵa kóshirilip jatyr. Bul durys emes. Bizdiń qazaqtyń tamyry aýylda. Eki otbasy turatyn aýyl bolsa da, sol aýyldyń jaǵdaıy jasalýy kerek. Osy máseleni qolǵa alsaq pa dep otyrmyz. Aýyldy kórkeıtpeı, memlekettiń jaǵdaıy ońalady dep aıtý qıyn. Aýylda turý úshin aýyl eńbekkerlerine tııanaqty jaǵdaı jasalýy kerek. Bilim, mádenıet, sport syndy qaı salany alsaq ta, qaladan kem turmaýy kerek", - dedi.

Memorandýmǵa qol qoıý rásiminde "Aýyl" partııasynyń tóraǵasy Álı Bektaev "Qazaqstan fermerleri qaýymdastyǵynan" qabyldanǵan partııanyń jańa múshelerine partııalyq bıletterdi tabys etti. "Qazaqstan fermerleri qaýymdastyǵynyń" basqarma tóraǵasy men orynbasarlary, atqarýshy dırektory jáne aımaqtyq fılıaldarynyń tóraǵalary saltanatty rásimmen "Aýyl" partııasynyń qataryna qabyldandy.

Ilmek sózder: memorendým

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir