Máýlen Áshimbaev Toqaevtyń qabyldaýynda boldy

Prezıdent Qasym-Jomart Toqaev parlament senatynyń tóraǵasy Máýlen Áshimbaevty qabyldady, dep habarlady Aqordanyń resmı saıty.

Qasym-Jomart Kemeluly senat spıkerimen parlamenttiń jańa sessııasynyń ashylýyna daıyndyq máselelerin talqylady. Sondaı-aq prezıdentke joǵarǵy palatanyń ótken sessııadaǵy zań shyǵarý qyzmetiniń negizgi qorytyndylary týraly aqparat berildi.

Senat tóraǵasynyń aıtýynsha, depýtattyq korpýs saıası reformalardyń jıyntyǵyn zań turǵysynan tolyq qamtamasyz etti. Halyq densaýlyǵy, pedagog mártebesi, ardagerler týraly mańyzdy zańdar jáne pandemııa kezinde azamattar men bıznesti qoldaýǵa baǵyttalǵan túzetýler jan-jaqty pysyqtalyp, qabyldandy. Aldaǵy sessııa barysynda senat qyzmeti Qazaqstandy daǵdarystan keıingi kezeńde damytý strategııasyn iske asyrýǵa baǵyttalady.

Máýlen Áshimbaev Qasym-Jomart Toqaevqa ótken senat depýtattaryn saılaýdyń qorytyndylary, senatorlardyń óńirlerge sapary jáne aǵymdaǵy qyzmeti týraly málimet berdi.

Memleket basshysy ekonomıkalyq ósimdi qaıta qalpyna keltirýge jáne halyqtyń turmys sapasyn kóterýge baǵyttalǵan bastamalardy zań turǵysynan sapaly jáne jedel iske asyrý qajet ekenin aıtty.

Prezıdent senattyń róli árbir zańnamany jiti pysyqtaý, sondaı-aq zańdardy qabyldaý kezinde memlekettiń basty ustanymdaryn jáne jalpy ulttyq múddelerdi qoldaý ekenin atap ótti.

Qasym-Jomart Toqaev sybaılas jemqorlyqty joıý jáne turǵyndardyń memlekettik apparatqa degen senimin arttyrýǵa baǵyttalǵan jańa bastamalardy zańmen bekitýdiń mańyzdylyǵyna nazar aýdardy.