Prezıdent: Adam qanshalyqty arsyz bolýy kerek?

Memleket basshysy Qasym-Jomart Toqaev turmystyq sybaılas jemqorlyqpen kúreske qatysty pikir bildirdi. Bul týraly Aqorda saıty habarlady.

– Kúndelikti ómirde jemqorlyq jaǵdaılaryna tap bolǵan jurt sharasyz kúıge túsedi,  ádildiktiń bar ekenine senbeıdi. Pandemııamen jalpy ulttyq deńgeıde jappaı kúres júrip jatqanda paıda tabý úshin adam qanshalyqty arsyz bolýy kerek? Mysaly, Almatydaǵy Jetisý aýdany ákimdiginiń qyzmetkerleri azamattardy blok beketten ótkizý úshin únemi para alyp otyrǵan. Mundaı derekter birneshe óńirde baıqaldy. Tipti, barlyq jerde osylaı bolǵan shyǵar dep oılaımyn, – deıdi ol.

Prezıdent sybaılas jemqorlyqqa qarsy is-qımyl agenttigi úkimetpen birlesip, turmystyq jemqorlyqpen kúres jónindegi jol kartasyn ázirleýi keregin atap aıtty.

– Azamattarymyz turmystyq sybaılas jemqorlyqpen betpe-bet kelip otyrǵan kezde siz ben bizdiń istep jatqan jumysymyzdyń esh tıimdiligi bolmaıdy. Eshqandaı halyqaralyq reıtıngtiń de keregi bolmaı qalatyny túsinikti. Túrli tartý-taralǵy berý, syılyq talap etý, dıplom satyp alý – kelmeske ketýi kerek. Bul úshin qoǵamda jemqorlyqtan jappaı jırenýge qol jetkizýimiz qajet, – dedi Toqaev.