Shyǵys Qazaqstanda 17 tamyzdan bastap medısınalyq uıymdar josparly túrde kómek kórsetýdi qaıta jandandyrdy

Josparly qyzmetti jandandyrý úshin kezeńdik jospar jasaldy. «Áleýmettik medısınalyq saqtandyrý qory» KEAQ ShQO boıynsha fılıalynyń málimetinshe, kesheden beri 50-den astam medısınalyq uıym naýqastardy qabyldaýdy bastap ketti.

17 tamyzdan bastap kardıologııalyq kómek kórsetý stasıonary, kardıohırýrgııa, ortopedııa, barlyq pedıatrlyq profıl, hırýrgııa, gınekologııa, ýrologııa, barlyq terapevtik profılder, ońaltý, júkti áıelderdi josparly túrde jatqyzý, pallıatıvti kómek kórsetý qaıta bastaldy.

Ambýlatorlyq-emhnalyq kómek kórsetý ashyldy. Alǵashqy medısınalyq-sanıtarlyq kómek berý uıymdary men stomatologııalar josparly qabyldaýdy júrgizýde. Sondaı-aq josparly konsýltatıvti-dıagnostıkalyq qyzmet kórsetiledi.

– Provızorlyq stasıonardyń jemisti jumysynan soń biz naýqastardy josparly túrde ekinshi jáne úshinshi kezeń boıynsha ońaltýdy bastadyq. Bul jaraqat, ortopedııa, nevrologııa, kardıologııa bólimderi jumys isteıdi degendi bildiredi. Adamdar joldama boıynsha joǵary tehnologııalyq kómek kórsetetin emhanada nemese stasıonarda ońaltýdan óte alady. Júrekke, býyndarǵa, omyrtqaǵa, bas mıǵa jáne jaraqat ornyna ota jasata alady, - dedi Shyǵys Qazaqstan oblystyq ońaltý ortalyǵynyń bas dárigeri Tımýr Tortaev. 

20 tamyzdan bastap stasıonarlarda, bólimshelerde, ońaltý kezinde stasıonar almastyrǵysh tehnologııalar jumys isteıdi. Sondaı-aq skrınıng pen profılaktıkalyq qaraý jumystary qaıta jandanady.

Densaýlyq saqtaý basqarmasynyń málimetinshe, oblysta 4731 ınfeksııalyq jáne provızorlyq tósek jınalǵan. COVID-19 shaldyqqan naýqastarǵa arnalǵan tósek qorynyń 16,5 paıyzy bos emes. Oblystaǵy ortasha reprodýktıvtik sany 0,74 quraıdy.

Karantınniń jeńildetilgenine qaramastan Shyǵys Qazaqstandaǵy medısına qyzmetkerleri oblys turǵyndaryn barlyq qaýipsizdik sharalaryn saqtap, betperde (maska) kııý rejımin umytpaı, buqaralyq otbasylyq sharalardy uıymdastyrmaı, salaýatty ómir saltyn ustanýǵa shaqyrady.