Sádibek Túgel: Alekseı Vladımıruly, tez arada kadrlyq rezerv jasańyz

Qazaqstan Respýblıkasynyń densaýlyq saqtaý mınıstri Alekseı Soı Vladımırovıchke

Amanat

Qurmetti Alekseı Vladımıruly!

Sizge kómek bolsyn degen nıette, biraz usynystarymdy usynamyn. Qabyldaý nemese qabyldamaý Sizdiń quzyryńyzda. Sonymen eń birinshi, nege kóńil aýdarǵan jón, dep sanaısyz?

Birinshiden, qazirgi qazaq dárigerlerine MEIIRIM jetpeıdi. Kóbiniń radıkýlıti bar. Belderi búgilmeıdi. Meıirimsiz dárigerler men shala-pula medbıkeler qaptap ketti. Bul jerde aıtarym, aýyrǵan adamǵa aldymen ýkol men dári emes, bas dárigerdiń, onyń orynbasarlarynyń, emdeýshi dárigerdiń, aǵa medbıkeniń jyly qabaǵy men meıirimi jáne "jazylyp ketesiz" degen jyly sózi aýadaı qajet.

Sondyqtan búkil Qazaqstan dárigerlerine osy qaǵıdany aıtyp, sanalaryna jetkizińiz. Kezek kúttirmeıtin másele.

Ekinshiden, KSRO kezimen salystyrǵanda bizdiń eldiń dárigerleriniń kásiptik biliktiligi men bilimi kóp tómendegen. Úsh kúnde úsh dáriger aýyssa, úsheýi úsh bólek em-dom jasaıdy. Áli ekpe sala almaıtyn dárigerler kezdesedi. Bul ne sumdyq! Osy jaǵdaıdy da qatań baqylaýǵa alý kerek. Medısına mamandaryn daıarlaıtyn barlyq joǵary oqý oryndary men medkolledjderdiń professorlary men dosentterin attestasııadan ótkizip alýdy usynamyn. Kásibı bilimdi jetildirý kýrstarynyń sabaqtaryn ótkizýdi mınıstrlik qatty baqylaýǵa alǵany jón. Bizge, tutynýshylarǵa mamandyqtaryn jaqsy biletin, naǵyz professıonal, myqty dárigerler men medqyzmetker kerek. Nadan, saýatsyz dárigerlerdiń jumys istegeninen istemegeni durys. Bir sózben aıtqanda, tazalańyz. Júırik dárigerlerdi qaldyryp, kisi óltiretinderdi medısınaǵa jolatpańyz.

Úshinshiden, burynǵy Keńes odaǵy kezeńindeı dárigerlik "obhod" jasaý praktıkasyn barlyq aýrýhanalar men gospıtaldarda engizý qajet. Oǵan mindetti túrde, bas dárigermen onyń orynbasarlary qatysýy qajet. "Obhodtyń" orny óte zor.

Tórtinshiden, medısınadaǵy jemqorlyqqa basa nazar aýdarýyńyz kerek. Birtanov basynda bastady da, keıin tastap ketti. Ol úlken qatelik boldy. Siz sony qaıtalamańyz. Eń aldymen keıbir bas dárigerler men hırýrgterdiń is-qımylyna muqııat tekserý júrgizý kerek.

Besinshiden, kúzde pandemııanyń "ekinshi tolqyny" bolady degen áńgime jıi aıtylýda. Bizdiń usynysymyz, tez arada "medısınalyq mobılızasııa" ótkizip, úlken kadrlyq REZERV jasańyz!

Qurmetpen, Sádibek Túgel

"Uly Dala Qyrandary" halyqtyq qozǵalystyń tóraǵasy,

Nur-Sultan qalalyq "Antıkor ortalyǵynyń" aqparattyq aǵartý ShTABYNYŃ basshysy, jazýshy