Esirtki saýdasymen aınalysty dep aıyptalǵan Qazaqstan azamaty Reseıden qaıtaryldy

"Esirtki kontrabandasymen aınalysqan, transulttyq uıymdasqan top qurdy jáne ony basqardy" dep aıyptalǵan azamat Reseıden Qazaqstanǵa qaıtaryldy. Bul týraly Reseı Federasııasynyń Bas prokýratýrasy málimdedi.

"Reseı Federasııasynyń Bas prokýratýrasy sheteldik áriptesteriniń suraýy boıynsha Qazaqstan azamaty Stas Larındi qylmystyq qýdalaý úshin ustap berý týraly sheshim qabyldady. Ol Qazaqstan Respýblıkasy Qylmystyq kodeksiniń 264-babynyń 1-bóliginde (transulttyq uıymdasqan top qurý jáne oǵan basshylyq etý), 286-babynyń 4-bóliginde (esirtki quraldary men psıhotroptyq zattardyń kontrabandasy), 297-babynyń 4-bóliginde (esirtki quraldary men psıhotroptyq zattardy ótkizý maqsatynda zańsyz saqtaý, tasymaldaý, jóneltý jáne ótkizý) jáne 385-babynyń 2-bóliginde (jalǵan qujatty qoldan jasaý jáne ótkizý) kózdelgen qylmystardy jasady dep aıyptalýda" delingen bas prokýratýranyń resmı saıtyndaǵy habarlamada.

Sondaı-aq  S.Ların 2016 jyly esirtki quraldary men psıhotroptyq zattardy paıdakúnemdik maqsatpen aýyr jáne erekshe aýyr qylmystar jasaý úshin turaqty qurylymdalǵan transulttyq uıymdasqan top quryp, ony basqarǵany belgili boldy.

2016 jyldyń maýsymy men 2017 jyldyń qazan aıy aralyǵynda ol esirtki quraldary men psıhotroptyq zattardy zańsyz ótkizýdiń arnasyn uıymdastyrgen. Zattardy birneshe ret Qazaqstan kedendik shekarasy arqyly el aýmaǵynda odan ári zańsyz satý úshin transulttyq uıymdasqan top múshelerine jibergen.

Ların jibergen esirtki jáne psıhotroptyq zattar Almaty qalasynyń áýejaıyndaǵy halyqaralyq poshta óńdeý bólimine kelip, "Qazposhta" men bólimshelerine jiberilgen.

Sondaı-aq ol Reseı Federasııasynda júrgende esirtki quraldary men psıhotroptyq zattardy zańsyz satýdy uıymdastyrý úshin ınternet-dúken qurǵan.

Ların 2019 jyldyń jeltoqsanynda Novosıbırsk oblysynyń aýmaǵynda ustaldy.