12 Tamyz, 2020 Suhbat

"Kesh qalmany" tiri qalý úshin jazdym". Jazýshy Torǵynnyń ekinshi kitaby shyqty

Fotokollaj

Torǵyn Joldasbekqyzy – jazýshy, "Arasha", "Kesh qalma" kitaptarynyń avtory. Avtor Qamshy tilshisine jaqynda baspadan shyqqan "Kesh qalma" kitaby jaıly áńgimelep berdi.

Jazýshy romandy oqyǵandar óz ómirine analız jasaıtynyn aıtty.

– "Kesh qalma" romanynyń on shaqty negizgi keıipkeri bar. 10 túrli taǵdyr. 10 túrli sezim. 10 túrli kúı, minez. Bir ǵana máselege 10 túrli kózqaras. Ár adam solardyń birinen ózin tabady. Sol keıipkermen tanysý arqyly ózine, óz ómirine analız jasaıdy. Muny osydan tórt jyl buryn shyǵarmany paraqshamda 25 bólimge bólip jarııalaǵan kezde baıqadym. Roman árkimge árqalaı áser etken. Biri "shyǵarma qaıtpas qaısarlyq jaıly, basyma ne tússe de, jeńilmeýim kerek ekenin uqtym" deıdi. Ile-shala ekinshisi, "ıá, ómirmen arpalysyp, baqyttan kesh qalǵansha, bir sát jeńile bilgen jón eken" dep jatady. Biri "mahabbattyń dámin tattym" dese, "ekinshisi qyzǵanyshtan órtendim" deıdi. Al keı pikirdi oqyp, belgili bir sıtýasııaǵa ózimniń bir jaqty ǵana qarap kelgenimdi uǵamyn, – dedi ol.

Onyń aıtýynsha, kitaptyń alǵashqy nusqasynda qate kóp bolypty.

– Tórt jyl buryn romandy jazǵan soń redaktorǵa asyǵys tekserýge jiberdim. Redaktor shyǵarmamdy alǵan soń, eki aıdaı jumysqa kirise almaı júrdi. Kúte almaı, keri qaıtaryp aldym. Sol kezde ol kisi jaı ǵana "negizi, kitabyńnyń qatesi kóp" dep qaldy. Sol úshin alǵashqy redaktoryma alǵysym sheksiz. Qazaq "basy qatty bolsa, aıaǵy tátti bolady" demeı me? Sońǵy jyl shyǵarmamdy qaıta-qaıta oqyp, sol qatelerdi taýyp, túzeýmen boldym, – deıdi qalamger.

Avtor kitapty jazý barysynda erekshe kúıde bolǵanyn jetkizdi.

– "Kesh qalmany" tek tiri qalý úshin, boıymdaǵy qorqynysh, ókinish pen úreıden arylý úshin jaza bastadym. Birde jylap, birde kúlip, birde qanym qaınap, birde sup-sýyq bop ózgerdim. Sol sezimdi kitaptyń ón boıynda qaıta súrip óttim. Osy sáttiń bárinde ózimniń tiri ekenimdi bildim. Sol sezimdi oqyrmanym da tatsa eken degen oı boldy.

Biraz jyl buryn bar jıǵan qarajatymmen kitap shyǵarmaq bolyp, sońynda shyǵynǵa ushyraǵanmyn. Qaıta meni qoldaǵan jaqyndar boldy. Al oqyrmandarym "sen jaz, biz oqımyz" deıtin. Osyndaı altyn oqyrmany bar men de, "Arasha" men "Kesh qalma" da baqytty. Sondaı-aq "Kesh qalmanyń" shyǵýyna úlken úles qosqan – qurbym Áıkerim Nuqpaeva. Baspaǵa qatysty bar sharýany óz moınyna alyp, kitaptyń ishki-syrtqy dızaınyn quryp júrgen de osy qyz, – deıdi ol.

Avtor alǵashqy kitaby óz shyǵynyn artyǵymen japqanyn, "Kesh qalma" kitabynan da úmiti zor ekenin aıtty.

– Alty jyldan beri áleýmettik jelilerde áńgimelerimdi tegin bólistim. Al bir jyl buryn qarajatymdy jınastyryp, dostarymnyń kómegimen "Arasha" kitaby shyqty. Qalamym nanyma aınalǵaly bir jyl ǵana boldy. Alǵashqy kitabymnyń aqshasy óz shyǵynyn japty. Túrkııanyń eki qalasyna eki jaqynymdy saıahatqa jibersem degen armanym oryndaldy. Sondaı-aq "Kesh qalmany" shyǵaratyn qarajattyń jartysyna jýyǵyn jınap qoıýyma jetti. "Kesh qalma" kitabynan da úmitim zor. Josparym da joq emes, – dedi jazýshy.

Oqı otyryńyz:

♦ Torǵyn Joldasbekqyzy: Adam arbada otyrsa da múmkindigi shektelmeıdi

 

Ilmek sózder: Torǵyn Joldasbekqyzy

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir