05 Tamyz, 2020 NEWS

Maska taǵý tártibin buzǵandarǵa 80 myń teńgege deıin aıyppul salynady

astana.gov.kz

Tártip saqshylary qoǵamdyq oryndarda medısınalyq maska taǵý mindetti ekenin eskertedi, dep habarlaıdy Nur-Sultan ákimdiginiń resmı saıty.

Elordanyń bas memlekettik sanıtar dárigeriniń buıryǵyna sáıkes, úıden shyqqanda medısınalyq maska taǵý mindetti. Bul aýrýdyń aldyn alý úshin jasalady. Quqyq buzýshylarǵa 30 AEK nemese 79 530 teńge aıyppul salynady.

– Birinshi kezekte polısııa aldyn-alý jumystaryna kóńil bóledi. Adam kóp jerlerde, saıabaqtarda, skverlerde, qoǵamdyq kólikterde túsindirý jumystaryn júrgizip, azamattarǵa maska taǵýdy usynamyz. Eger adam kóp oryndarda maska taqpasa ákimshilik jaýapkershilikke tartylady. Birinshi kezekte biz tártip buzýshylarǵa qatysty aldyn-alý sharalaryn qoldanamyz, – deıdi qalalyq polısııa departamentiniń resmı ókili Danııar Oralov.

Sondyqtan halyqtyń densaýlyǵyn saqtaý, koronavırýs ınfeksııasynyń aldyn alý jáne boldyrmaý úshin azamattar medısınalyq maska taǵýy kerek.

О́z kezeginde, elorda turǵyndaryna blıs-saýalnama kórsetkendeı, respondentterdiń kópshiligi maska qorǵanys retinde qajet ekenine jáne ony jabyq ǵımarat ishinde kııý kerek ekenine senimdi.

– Menińshe, syrtta maska taǵý qajet emes, óıtkeni taza aýa odan da mańyzdy. Iá, jabyq ǵımarat ishinde áleýmettik qashyqtyq saqtaý, maska taǵý kerek, biraq kóshede mindetti emes, – deıdi qala turǵyny.

– Men jaǵalaýda, adam kóp emes jerde taza aýamen dem alý úshin maskany sheshemin. Mende vırýs bolýy múmkin ǵoı, sondyqtan adamdar arasynda maska taǵyp júremin, – deıdi taǵy bir elorda turǵyny.

Esterińizge sala keteıik, jabyq, qoǵamdyq oryndarda, halyqqa qyzmet kórsetý ortalyqtarynda, dúkender men dárihanalarda, medısınalyq mekemelerde maska taǵý mindetti.

– Maska taǵý COVID-19 ınfeksııasynyń aldyn alý úshin óte mańyzdy. Maska taǵýdyń durys tártibin saqtaý kerek jáne ár eki saǵat saıyn aýystyrý qajet, – dep túsindiredi terapevt Azıza Aldanbaeva.

Eske salaıyq, Qazaqstanda karantın rejımi 17 tamyzǵa deıin uzartyldy.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir