Qazaqty árkim bıleı me, álde…

Álqıssa... Eńký-eńký jer shalǵan erlerdiń egeýli naızasynyń ushymen jıylǵan qazaqtyń ulan-baıtaq dalasyna urpaq qamy úshin «el qondyrǵan, jaǵalaı jatqan sol elge mal toltyrǵan», Jeti Jarǵyny buljytpaı ustanyp, qara qyldy qaq jara bılik aıtqan danalarymyzdyń arqasynda Alash jurty ǵasyrlar boıy ǵadeletpen basqarylyp kelgen-di. Al, Reseı bodandyǵynyń qanquıly kezeńin bastap bergen Lenınniń eldi, memleketti árkim, «tipti qazan ustaǵan qul men kúń de bıleı alady» degen zymııan teorııasy qazaqtyń ǵasyrlar boıy qalyptasqan baǵzy bılik júıesiniń tamyryna balta shapty.

Oqyǵandar, «molda men baılar qamshymen qoıdaı» qýylǵan bul saıasatqa sáıkes elge bılik júrgizetin atqaminerler taptyq belgilerge oraı «teris seleksııa» boıynsha iriktelip alyndy. «Saı saıǵa, baı baıǵa quıady» degendeı, osy qaǵıdatpen jetpis jyl boıy qalyptastyrylǵan nomenklatýra zeınetke shyqsa da, bıik oryntaq pen jyly orynǵa óz muragerlerin otyrǵyzyp ketti. Endi mine, eldiń eldigi, erdiń erligi syn tezine túsip jatqan kúrdeli kezeńde ıdeologııa men ekonomıkaǵa, áleýmettik ómirge «jaýapty kadrlardyń» senimdi aqtamaǵanyn, olardyń biliksiz-bilimsizdigi, adamnyń emes, atanyń uly, paranyń quly bolyp otyrǵanyn, mundaı jetesizderdi memlekettik bılikke budan bylaı bir qadam da jaqyndatýǵa bolmaıtynyn jalpaq jamıǵat kórip, jaǵasyn ustaýda. Sondyqtan da bolar, Prezıdent Qasym-Jomart Toqaev «memlekettik basqarýdy qaıta qurýdyń», túbegeıli reformalaýdyń kerektigin aıyryqsha atap kórsetti. Osynaý shuǵyl sheshimge bılik basyna otyz jyl boıy senimdilik «súzgisinen ótkizilgen» toǵysharlardyń toptasýy sebepker boldy.

Joǵary Bas qolbasshy: «Biz-soǵys jaǵdaıyndamyz!»

«Jaý jaǵadan alǵanda, bóri etekten tartady» degen, osyǵan oraı Memleket basshysy, Joǵary Bas qolbasshy Qasym-Jomart Toqaev Qazaqstannyń qazirgi ahýalyn «Biz-soǵys jaǵdaıyndamyz!» dep túıindedi.

Qamsyz jatqan beıbit jurtqa tutqıyldan jaý tıgende qaıratyna minip, «qasarysqan dushpanǵa qandy kóbik jutqyzatyn» sarbazdar, jer qaıysqan qalyń qoldy bastaıtyn sardarlar, qara qyldy qaq jaryp, qaharly qolbasshyǵa jón siltep, jol kórseter danagóıler arqasynda el eldigin, egemendigin saqtap qalady.

Endi mine, búginge deıin dúmbilez, paraqor sheneýnikterge «e, ózimizdiń bala ǵoı, jas qoı, alyp ketedi ǵoı» dep, al qoǵam múlkine, qazynaǵa qol salǵan, qol salǵanda mol salǵan alaıaqtarǵa «qolynan keldi, qonyshynan basty» dep keshirimmen qaraǵan keńqoltyq qazaq el basyna kún týǵanda Prezıdenttiń «Biz soǵys jaǵdaıyndamyz»! degen uranyna den qoıyp, etek-jeńin jınaýǵa kiristi, qaıǵy jutyp, ah urǵan qaıran jurtyna tireý bolar tulǵany, tulpar minip, tý ustaıtyn oǵlandy, qol bastaıtyn bahadúrdi izdeı bastady.

Aqıqatyn aıtqanda, el men jerdiń taǵdyryna jaýap beretin memleket basshysy arqa súıer arly da aqyldy azamattar saýsaqpen sanarlyq bolyp shyqty. Prezıdenttiń óz sózine súıensek, «masaıraýdyń qaqpanyna túsken mınıstrler de, ákimder asa kúrdeli jaǵdaıda jumys isteı almaýda». Sóıtsek, oıyn-kúlki, dyr-dýmanmen ótken otyz jylda orda buzar otyz azamat ortaǵa shyqpapty, áı deıtin ájeniń, qoı deıtin qojanyń, «noǵaıly ulynyń adasqanyn jolǵa salar» abyz aqsaqaldyń joqtyǵynan balaqtaǵy bıt basqa órlep, jyly-jumsaqqa tumsyq tyqqan qul-qutannyń, qaýǵa ustar qoıshy-qolańnyń záýzáti el baılyǵyn emin-erkin soryp, saıran salyp kelipti. Abyzdyń ornyn keshegi keńestiń shıdem shekpenin sheshpegen, paıǵambar jasynan assa da qadir-qasıetten jurdaı, aqsaqal deýge aýzyń barmaıtyn aıyr quıryq shaıandar basqan. Osydan bes-alty jyl buryn jergilikti baspasózden myna bir habardy oqyp, jaǵamdy ustaǵanym bar. Naýryz merekesinde jap-jas ákim aýyz tıgen kójege talasqan «aqsaqaldar» kesedegi aqty ústerine aqtaryp, elge kúlki bolǵan. Al, Almaty men Astanadaǵy kún kósemge teńeý taba almaı, shashtary aǵarǵan shımaı-shatpaqshylar «Kókte kúnnen nár alǵan, Kópke nur bop taralǵan», «Halqyna oqtyń daýsyn estirtpegen» laýazym ıeleri jaıly qulash-qulash óleń jazyp, tipti paıǵambarymyzben tildestirýge kóshken.

Toqsanynshy jyldardaǵy jekeshelendirýde jiliktiń maıly basy buıyrǵan osynaý kójege talasqysh ardagerler álemdegi eń baı memleketterdiń biri Qazaqstandy qor qylyp, qaıyrshynyń haline túsirse, olardyń bel balalary aspannan altyn jaýǵan ekimyńynshy jyldary mıllıondaǵan qarjyny jymqyryp, shetel asty, al nemereleri búginde tender arqyly upaıyn túgendep, atyshýly «Medısınalyq saqtandyrý qory» men «SK-Farmasııa» sııaqty «saýyn sıyrlardy» tóńirektep júr. Sóıtip, jyrtqyshtardyń egemendiktiń eleń alańynan bastaý alatyn tutas bir úsh urpaǵyna aramzalyq qasıet qan arqyly, otbasyndaǵy opasyz tálim-tárbıe arqyly berilip kelipti. Reseıde «jańa dvorıandar» dep atalatyn búgingi qazaqtyń jatypisher baı-baǵlan, myrzalary memlekettik bılik pen ekonomıkany tolyqtaı derlik jaýlaǵan.

Osynyń aıǵaǵyndaı, suǵanaq memlekettik qyzmetshilerdiń para alý ústinde ustalǵandary jaıynda teledıdar men gazet-jýrnal qazir kún qurǵatpaı taratyp jatqan jaısyz habarlarǵa qulaǵymyz qanyǵyp, etimiz úırendi. Memlekettik apparatty jemqorlardyń ordasy sanaıtyn boldyq. Al, jemqorlyq-sybaılasqan zań buzý ózegi desek, qylmyskerliktiń bir ushy bılikke kelip tireletinin amalsyzdan moıyndaımyz. Sózim ýájdi shyǵý úshin ǵalamtorda kúni keshe ushyratqan myna derekti qaz-qalpynda berip otyrmyn: «Qazirgi ýaqytta Sybaılas jemqorlyqqa qarsy is-qımyl agenttigi «Medısınalyq saqtandyrý qory» kommersııalyq emes aksıonerlik qoǵamynyń laýazymdy tulǵalarynyń bıýdjet qarjysyn jymqyrý, jekelegen tulǵalardyń iri kólemde medısınalyq betperdelerdi satý, sondaı-aq, medısına mekemeleriniń jekelegen basshylarynyń asa iri kólemde bıýdjet qarjysyn jymqyrýǵa tyrysý derekteri boıynsha úsh qylmystyq isti tekserip jatyr... Koronavırýspen kúreske bólingen asa iri kólemdegi memlekettik qarjyny alaıaqtyq jolmen jymqyrý deregi boıynsha qylmystyq isti tekserilýde. Qaýipsizdik keńesiniń apparaty men prezıdent ákimshiliginiń usynysy boıynsha sheteldik gýmanıtarlyq kómektiń jumsalýy tekserile bastady. Dári-dármekterdi jasyrý jolyn kesý, emdeý mekemelerinen urlanǵan dári-dármekterdi qaıta satý sııaqty áreketterdiń aldyn alý sharalary jalǵasýda».

Osy «Medısınalyq saqtandyrý qory» kommersııalyq emes aksıonerlik qoǵamy tárizdi, sondaı-aq jýrnalıst Gúlbaný Ábenovanyń qalamgerlik qaıraty arqasynda aıdaı álemge áıgili bolǵan Samuryq-Qazyna qory janyndaǵy «Farmasııa» fırmasy sııaqty myńdaǵan meshkeıler uıalary qymqyrǵan qarjyny otyz jylǵa kóbeıtip kórseńiz, tóbe shashyńyzdyń tik turaryna ılanamyn.

«Alystan dám tatýǵa» suranyp-aq turǵan búginginiń erkeleri men serkeleriniń, «sengen qoıym sen bolsań» deıtin bizdiń basshy-qosshylarymyzdyń, el qamyn jeıtin Edigelerimizdiń syqpyty osyndaı.

 «Biz-soǵys jaǵdaıyndamyz!» dep uran tastaǵan Joǵary Bas qolbasshy osynaý azǵyn tobyrǵa arqa súıeı ala ma? Áskerı tilmen aıtqanda rezervi qaıda? Onyń joqtyǵyna kózimiz jetti degen oıdamyn.

Qorqaý qasqyrdaı el yryzdyǵyn opyryp jegen opasyzdardyń kesirinen «halyqtyń jergilikti jáne ortalyq bılikke senbeıtinin» atap ótken Prezıdent «memlekettik basqarýdy qaıta qurý kerek» dep málimdegeni sondyqtan. О́ıtkeni, bılik oryndaryn jemqorlyq, zańsyzdyq, biliksizdik jaılaǵan. Betke shyǵar mınıstrler men ákimderdiń kóbi «ózekti problemalardy shuǵyl sheshýdi, azamattarǵa memlekettik saıasatty durys túsindirýdi bilmeıdi», sebebi kóbiniń ǵylymı dárejeleri men ataqtary satyp alynǵan!

Uly Abaıdyń saýaly

Sonymen, memleketke, el-jurtqa adal qyzmet etetin janashyr kadrlardy qaıdan tabamyz? Danyshpan Abaıdyń «zınhar, senderden suraıyn dep júrgen» saýalynyń bir parasy osynaý bilikti, bilimdi azamattarǵa qatysty bolsa kerek. О́z dáýirindegi «alys-jaqyn qazaqty» syn tezinen ótkizgen hakim «ózi erjetip, ata-anasyn tuzaqtan qutqararlyq bala qazaqtan týa ma eken? Ondaı balany sendeı áke, seniń elińdeı el asyrap, ósirmek pe eken?» dep nalyǵan bolatyn. Iá, joǵaryda aıtqanymyzdaı, paraqor atadan, jemqor ákeden odan asyp túsken «perzent» týsa kerek. Tutas bir urpaq aýysyp úlgeretin otyz jyl boıy qoǵam ómiriniń barlyq salasynda teris irikteý júrgenin, bılik basyna alaıaqtar ornyǵyp, óziniń aqyly men qaıratyna ǵana sengen jigitter men qyzdar muhıt asqanyn jaqsy bilemiz. Muny bıliktiń ózi moıyndap otyr.

«Tipti basshylyq laýazymdardy aıtpaǵannyń ózinde, mınıstrlikte qarapaıym qyzmetke tıisti maman tabý óte qıyn» deıdi burynǵy aýyl sharýashylyq mınıstri, kóziqaraqty qaýymnyń pikirinshe Baltash Tursynbaevtan keıin sala ahýalyn jaqsartýǵa bar kúsh-jigerin jumsaǵan tulǵa, professor Aqylbek Kúrishbaev. Al, maman joǵary oqý ornynda tárbıelenedi. Siz osy tárbıeniń máni men maǵynasyna úńilip kórdińiz be? О́zgeni qaıdam, ózimdi aıran-asyr qylǵan myna jáıtti aldaryńyzǵa jaıyp salmaqpyn. Budan eki-úsh jyl buryn halyqaralyq FIBAA uıymy oqý baǵdarlamalaryn attestattaýdan ótkizgen bolatyn. Germanııalyq professorlar Tıbor Klıment, Erhard Rokhol, Olıver Hann «endi magıstranttar men doktoranttarmen pikirleselik» degen soń, onshaqty bolashaq mamandardy ortaǵa shaqyrdyq. Áńgime barysynda sheteldikterdiń aǵylshynsha qoıǵan suraqtaryna shákirtterdiń eshqaısysy lám-mım deı almaǵan soń tilmashtyń járdemine súıendik. Al, Ereje boıynsha magıstrantýra men doktorantýraǵa shet tilin erkin meńgergen, sóıleı de, jaza da biletin talapkerler túsýi tıis... Muny kórgen kirpııaz nemister bastaryn shaıqap, tańdanystaryn jasyrmady. «Búıtip júrip, qalaı el bolasyńdar, ózderińdi ózderiń nege aldaısyńdar?» degende, kirerge tesik tappadyq.

 «Ideologııalyq apparatqa bilim, tájirıbe, oı ushqyrlyǵy, batyldyq jetispeıdi» deı kele, Prezıdent «bizge basshylardyń jańa býynyn tárbıeleý kerek. Eldiń múddesin oılaıtyn mamandar bolmasa, bastamalarymyz nátıjesin bermeıdi» dep tujyrdy. Áı, qaıdam? Elimizdiń mańdaıaldy oqý ornyndaǵy jaǵdaı joǵarydaǵydaı bolsa, ózgelerindegi ahýaldyń qandaılyǵyn topshylaı berińiz. Túrli joldarmen magıstr, doktor dıplomdaryna qol jetkizgen alaıaqtar erteń mınıstrliktiń, ákimdiktiń, «SK-Farmasııanyń» kóldeneń tabysy mol, bıik oryntaǵyna qonjıyp, paraǵa bergen qarjysyn op-ońaı óndirip alady. Birer sekirip, basshylyq laýazymǵa qol jetkizgen soń tóńiregine ózi sııaqty quzǵyndardy jınaı bastaıdy, sóıtip oryssha «porochnyı krýg» dep atalatyn, arasyna adam túgil shybyn ene almaıtyn tabıǵı tuıyq orta túzedi.

Uly oıshyldyń saýaly áli jaýapsyz qalyp otyr...

Eldi árkim bıleı me?

Qazaq tarıhynda dál mundaı azǵyndaýdyń oryn alyp otyrǵany sońǵy otyz jyl bedeli. Bul arnaıy zertteýge ózek bolatyn taqyryp. О́tkendi bezbenge salsaq, Qazaq handyǵyn qurǵan kósemder de, azattyq ıdeıasyn bekemdep, ádebıeti men ǵylymynyń negizin qalaǵan Alash azamattary da ult úshin bastaryn báıgege tikken. Tipti bertinde, tyń ıgerýge qarsy bolǵany úshin ornynan alynǵan Jumabaı Shaıahmetov te, soltústiktegi bes oblysty respýblıka quramynda saqtap qalǵan Jumabek Táshenov te halyq esebinen kún kórýdi oılamaǵan tulǵalar. Olar halyqtyń muńy men zaryn jan júregimen sezinip, el erteńine eleńdegen. Osy rette «Hannyń qyzy halyqtyń jolyn jappasyn!» dep áleýmettik jelide moraldyq-etıkalyq túıtkildiń shetin shyǵarǵany úshin qýdalanyp jatqan Qyzylorda oblysynyń Jańaqorǵan aýdanynyń turǵyny Sandýǵash Turlybekovanyń taǵdyry oılantady. Ákim Gúlshara Ábdihalyqova memlekettik qyzmetshi Kodeksine laıyqty áreket qylmaǵandyqtan atalǵan keleńsiz oqıǵa oryn alyp otyr. Memleket basshysynyń «turǵyndarmen jumys isteý kerek. Ákimder memlekettiń saıasatyn azamattarǵa túsindirýi tıis» degen tapsyrmasy dál osyndaı deńgeıde oryndalyp jatsa, ózge laýazymdylardan ne úmit, ne qaıyr.

Qaı qubylystyń da baǵasy salystyrý, salǵastyrý arqyly beriledi ǵoı. Osy Qyzylorda oblysyn keńes zamanynda Erkin Nurjanuly Áýelbekov degen parasatty tulǵa basqarǵan bolatyn. Belgili ultjandy azamat Sádýaqas Ańsat sol kezeńdi bylaısha eske alady: «Erekeń kelgende basshylar jappaı memleket esebinen ózderine kottedj tıptes úıler salýdy úrdiske aınaldyryp, olaryn bıik qorshaýlatyp, jasaryp-jaınap júrip jatqan tus edi. Erekeń barlyq oblys, qala, aýdan kólemindegi basshylarǵa artyq aýmaǵy bar turǵyn úılerin balalar baqshasyna, emhanaǵa berýdi talap etti, bıik qorshaýlaryn kestirdi, keńsharlarǵa qonaq úı, ashana, joq jerlerge monsha salǵyzdy. Qala basshylarynyń ár shaǵyn aýdandarda turýy sol jerdegi turǵyndardyń qam-qareketin bilýine, ony sheshýine kómektesedi dep, bizdiń solaı etýimizge yqpal etti. О́zinen bastap, oblys, qala basshylaryna qala kósheleri bekitildi. Másele kóshelerdiń tazalyǵy, kógal bolýy ǵana emes, sondaǵy turǵyndardyń áleýmettik jaǵdaıyn, kóńil-kúıin zertteý, múmkindiginshe kómek berý. Qaladaǵy úlkendi-kishili mekemelerdiń bárin derlik ózi birneshe ret aralap, jaqsylaryn basqalarǵa úlgi etti, kemshilikteri barlarynan túzetý mindetti túrde suraldy.

Syr eli Erkin Nurjanuly Áýelbekovti qashanda qurmet tutady. Qyzylorda qalasynyń temirjol vokzalynan bastalyp, «Máńgilik alaý» janynan ótetin kóshege qaıratkerdiń atynyń berilýi de tegin emes. Endi, mine, daryndy balalarǵa arnalǵan №4 mektep-ınternatqa onyń esimi berilip, aýlasyna Erekeńe mármár tastan músini qoıyldy. Bıyl Erekeńniń 90 jyldyǵy da erekshe atalyp ótpekshi bolyp, is-jospar jasaldy». Sádýaqas Ańsattyń pikirinshe, el úshin aıanbaı eńbek etken azamattyń esimi el esinde saqtalyp qalǵan, ózi ómirden ótse de qadiri asqaqtaı túsken. Al, oblystardyń qazirgi kerenaý, kerdeń basshylarynyń aty-jónderi keıin eldiń jadynda saqtalar ma eken, sony oıladyńdar ma?

Sonymen, eldi árkim bılemeý úshin burynǵy-sońǵy tarıhty túgendep, ótken ómirdiń dárisin alyp, qorytyndysyn shyǵaryp otyrymyz lázim.

Ne isteý kerek?

Keńes zamanynyń osynaý ótkir saýaly taǵy da aldymyzdan shyqty. «Elimizde zań ústemdik etýi tıis. Zań aldynda bılik ókilderi de, azamattar da birdeı» degen Prezıdent «biz qolǵa alǵan saıası reformalardy jalǵastyra beremiz» dep túıdi. Iаǵnı, toqeterin aıtsaq, saılaý júıesin ózgertý qajet, al Parlament Senatyn, Qazaqstan Halqy Assambleıasyn taratý qarjy tapshylyǵy jaǵdaıynda utymdy sheshim bolyp tabylady.

Jergilikti ózin-ózi basqarý júıesine kóshý arqyly jaýapkershilik júgin Úkimetten el azamattaryna artyp, olardyń kúsh-jigerin bolashaqqa baǵyttalǵan jasampaz josparlarǵa baǵdarlaýǵa bolady.

О́ıtkeni, derek pen dáıekke úńilsek, el bıýdjeti bıyl 1,7 trln teńge qarjy joǵaltqan. Prezıdent málimdeýine sáıkes «bıýdjetti Ulttyq qordaǵy transfertter ǵana ustap tur». Iаǵnı, el bıýdjetiniń úshten biri 20 jyl buryn bolashaq urpaqqa dep qurylǵan Ulttyq qordyń transfertine tıesili. Jyl basynan beri Qazaqstan ekonomıkasy 1,8 paıyzǵa tómendegen, qyzmet kórsetý salasy 5,6 paıyzǵa qysqarǵan. Maýsymnyń qorytyndysy boıynsha, jyldyq ınflıasııa 7 paıyzǵa tómendegen. Bılik jyl sońyna deıin ınflıasııa 11 paıyzǵa deıin jetýi múmkin. Bul úreıli sıfr. Sondyqtan da ekonomıka mekemeleri monetarlyq saıasattan Keıns modeline kóshýi kerek. Qazannan qaqpaq ketse, ıtten uıat ketedi degen, júzdegen baǵdarlamalar men joba-josparlardy aýdıtten ótkizbese, baqylaýdy, kontrollıngti qalpyna keltirmese bolmaıdy. Uly toqyraýda Amerıkany saqtap qalǵan qoǵamdyq jumystardy qolǵa alý qajet. Pandemııada ulttyq taǵamdarǵa suranys artyp otyrǵandyqtan, aýyl sharýashylyǵy taýar óndirýshilerine memlekettik qoldaýdy kúsheıtken abzal. Jer paıdalanýda sheti shyǵyp otyrǵan túıinderdi tarqatqan jón. Munyń bári qıyndyqty elmen birge eńserýge septeser edi.

 «Úmit etken dostarym...»

S.Seıfýllın atyndaǵy Qazaq agrotehnıkalyq ýnıversıtetiniń rektory, professor Aqylbek Kúrishbaev bir suhbatynda «Elim deıtin erge erim deıtin el bolý kerek» depti. «El basyna kún týǵan ýaqytta, tán aýyrýymen birge jany kúızelgen eldi sabyrǵa shaqyryp, salıqaly sóz aıtatyn zııaly qaýym, ǵalymdar, óner qaıratkerleri emes pe edi. Jar astynda jaý baryn alystan boljap, elge aqyl aıtatyn sol zııalylarymyz osyndaı da el shetine shyǵyp, el basqarý jolynda salıqaly sóz aıtsa deımin. Memleket basshysynyń júrgizip otyrǵan zamanaýı keshendi basqarý jolyn halyqqa túsindirýge at salysatyn el aǵalary kóbeıse ıgi». Arpa ishinde bir bıdaı degen, jaqsylardyń kózin kórip, sarqytyn ishken, aqsaqal jazýshy, professor Qulbek Ergóbektiń de «Halyqtan artyq janym joq! Halyq bolmasa Siz de, biz de kimge kerekpiz?» dep, azamattyq ustanymyn tanytqanyn ǵalamtordan oqydym. Tuǵyrly tulǵalardyń úndeýin ilip alyp ketken kóptiń qarasy qorash. Ádette toptyń aldyn bermeıtin halyq qalaýlylary búginde únsiz.

«Elý jylda el jańa» deıdi halqymyz. Qytymyr qystyń izin ala jadyrǵan jaz keletinindeı, saıası, rýhanı bodandyqtyń siresken tońy jibıtinine, qoǵam sanasyn tumshalaǵan belgisizdik tumanynyń seıiletinine, áleýmet aǵzasyn indetken dertten aıyǵatynymyzǵa ılanatyn jannyń birimin. Sanaly, salıqaly urpaqtyń keletinine, qaımana qazaqtyń burynǵy er minezimen qaıtadan qaýyshatynyna, «elim deıtin erdiń» atqa minetinine kámil senemin. Qaıran jurtyna tireý bolatyn, tulpar minip, tý ustaıtyn oǵlandar, qol bastaıtyn bahadúrler-sizder men bizderdiń balalarymyz, nemerelerimiz shóberelerimiz. Uly Ybyraı «úmit etken dostarym, sizderge berdim batamdy» dep, Ahmet pen Mirjaqyp bastaǵan myńdaǵan shákirtke Aq jol nusqaǵan. Biz de ónegeli urpaǵymyzǵa qol jaıyp, bata berelik! Búldirshinderimiz «Álippe» men «Ana tilin» qaıtadan qoldaryna alatyn boldy, joǵaltqanymyzben qaýyshtyq, sonyń ózi súıinish! Al, ál-Farabı babamyzdyń ósıetine saı «ónegeli bilimdi» jolǵa qoıýǵa kúsh salyp júrgen jas mınıstr Ashat Aımaǵambetovty dúıim eldiń bále-jaladan qyzǵyshtaı qorǵaýy jańa zamannyń aq tańyndaı áser beredi.

Memleketimizdiń keleshegi úshin jalǵyz Prezıdent emes, bizdiń bárimiz jaýaptymyz. Keleshek urpaq aldynda jaýaptymyz.

Jetpisbaı Bekbolatuly,

professor, memlekettik qyzmet ardageri