04 Tamyz, 2020 Suhbat

"Qazaqstanda maǵan qarsylas joq". Qos qolynan aıyrylǵan chempıonnyń áńgimesi

qamshy.kz

Azamat Orazbek bala kúninde qýaty joǵary transformator toǵyna túsip, qos qolynan aıyrylǵan. Sol qoly ıyǵynan bastap joq bolsa, oń qolynyń shyntaqtan joǵary tusy ǵana bar. Azamat sonda da taǵdyryna nalyp kórmegen. Múmkindiginiń shekteýli ekenine qaramastan, ústel tennısimen, júzýmen kásibı túrde aınalysady. Atalǵan sport túrleri boıynsha Qazaqstan chempıony atanǵan. Sońǵy ýaqytta án jazyp, ónerden óz enshisin alýǵa talaptanyp júr. Búginde repertýarynda birneshe týyndy bar. Úılengen, 3 bala tárbıelep otyr. Qamshy tilshisi Azamat Orazbektiń qazir nemen aınalysyp júrgenin, josparlary men arman-tilegi týraly surap kórdi.

Azamat jattyqtyrýshylar keńesi boıynsha sońǵy ýaqytta ústel tennısinen ótetin jarystarǵa jıi shyǵa bermeıdi.

– Jattyqtyrýshylar bir sheshimge kelip, ústel tennısinen meni rezervke qoıdy. Endi bul sport túrinen Qazaqstannyń ishinde kóptegen jarystarǵa qatyspaımyn. Respýblıkalyq jarystarda Almaty quramasyna upaı kerek bolsa ǵana qatysamyn.

Azamat jubaıymenBul sheshimdi qabyldaýǵa birneshe sebep bar. Birinshiden, artymnan erip kele jatqan jastarǵa jol bereıin dedim. Ekinshiden, Qazaqstanda maǵan qarsylas shaq kelmeıdi. Sondyqtan Azııaǵa shyǵamyn. Alaıda ol jaqtan jeńispen oralý ázirge bizge múmkin bolmaı tur. О́ıtkeni qazir ústel tennısinen Qytaı, Koreıanyń sportshylaryna teń keler eshkim joq. Ázirge bizdiń dárejemiz olarǵa jetpeıdi. Sol sebepti bul sportpen ýaqytsha qoshtasýǵa týra keldi, – deıdi ol.

Azamat birneshe jyl boıy júzýmen aınalysa almaǵanyn da atap ótti.

– Birneshe jyl boıy kórý qabiletim nasharlaǵandyqtan, ýaqytsha júzýden qol úzýge týra keldi. Búginde bári ońalyp, qaıtadan júzýmen shuǵyldanyp júrmin. Endi jaqsy nátıjege jetsem deımin. Kez kelgen sportshy sekildi men de paralımpıada jeńimpazy bolǵandy armandaımyn. Olımpıadaǵa qatysý úshin upaı jınaý qajet. Tamyz aıynda Taılandqa ketýim kerek edi. Biraq búkil álemde bolyp jatqan pandemııaǵa baılanysty eshqandaı jarystarǵa shyǵa almaı otyrmyz. Karantınge baılanysty jattyǵýlar da toqtap tur. Aldaǵy ýaqytta jattyǵý zaly ashylyp qalar, – dedi sportshy.

Azamat sporttaǵy karerasy ýaqytsha toqtap turǵanymen, búginde bos júrgen joq. Qaıyrymdylyq sharasyna qatysyp, óziniń ánshilik qyryn damytýǵa baryn salýda.

– "Nur Otan" partııasymen birigip, jaǵdaıy tómen otbasylarǵa kómektesip júrmin. Sondaı-aq ónerdegi tyńdarmandarymdy jańa ándermen qýantsam deımin. Sol úshin tańerteńnen keshke deıin stýdııada án jazyp júrmin. О́nerge, án aıtýǵa kishkentaı kezimnen qumarmyn. Án shyrqap júrgenim tabys tabý men kúnkóristiń qamy ǵana emes. Munymen ózim jaqsy kórgendikten aınalysyp júrmin. Jalpy ózime qolymnan keletin tirlikpen aınalysqan unaıdy. Sondaı-aq jýyrda jaqyn baýyrlarymyzben birigip kıim satatyn dúken ashtyq, – deıdi Azamat.

Azamat Orazbektiń jeke muraǵaty

Keıipkerimiz álemde bolyp jatqan jaǵdaı tabysyna kesirin tıgizip jatqanyn, artyq tabys tabý múmkindigi joq ekenin aıtty. "Áıteýir eldiń kórgenin biz de kórip jatyrmyz. Qudaıdyń bergeni dep júrmiz" degen ol qazir jalǵyz ózine ǵana emes, kúlli halyqqa ońaı bolmaı otyrǵanyn jetkizdi.

Azamat anasy, inisi, qaryndasy, jubaıy jáne úsh balasy bári jaldamaly páterde turady. Anasy nemerelerine qarap úıde otyr. Qaryndasy bıyl stýdent atanbaq.

Azamatty taǵdyrdyń tosyn syıy da, túrli qıyndyq ta syndyra almaǵan. Maqsaty – aıqyn, qolynan bári kelerine bek senimdi. Armany – olımpıada chempıony bolý. О́nerde tyńdarman júregine jol tapqysy keledi. Arman-maqsatyna jetý jolynda tynbaı eńbektenip júr.

– Alla qalasa, bári de óz ýaqytymen bolady degen nıettemin, – deıdi ózi.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir