Foto: ishki ister mınıstrliginiń baspasóz qyzmeti

Tarazdyq polısııa maıory Dılıafrýz Kınjehanova toǵyz ul-qyzdy tárbıelep otyrǵan kópbalaly ana. Onyń beseýi óziniń balasy bolsa, tórteýin asyrap alǵan, dep habarlady ishki ister mınıstrliginiń baspasóz qyzmeti.

О́zi de úlken áýletten shyqqan polısııa maıory Dılıafrýz Kınjehanova óskende kópbalaly ana bolýdy armandaǵan. Búginde ol óz armanyna qol jetkizdi deýge bolady. Qazirgi tańda Taraz qalalyq polısııa basqarmasynyń kámeletke tolmaǵandar isi jónindegi polısııa aǵa ınspektory bolyp qyzmet etetin Dılıafrýz óziniń toǵyz balanyń anasy atanyp otyrǵandyǵyn maqtan tutady.

Ári úlken jaýapkershilik ekenin jan-júregimen sezinedi. Ol óziniń bes perzentimen qatar 4 balany baýyryna basqan. Mundaı oı oǵan №55 orta mektepte ótken "Mektepke jol" aksııasy barysynda kelipti. Tórt balanyń taǵdyry sonda sheshilgen.

Ol kezde balalardyń úlkenderi Marat 17 jasta, Rahym 15 jasta bolsa, qaryndastary Ramıla men Dıana 10 jáne 6 jasta edi.

– Men zańdy ókildersiz otbasyn anyqtaıtyn komıssııa quramynda boldym. Bul balalardyń anasy ómirden ozǵan. Ákesi joq eken. Atasy tárbıelep ósirgen. Qujattaryn qalpyna qalpyna keltirýge birshama ýaqyt kerek boldy. Osy ýaqyt aralyǵynda men olardy úıime apardym jáne múmkindiginshe kómektesýge sóz berdim. Balalar maǵan baýyr basyp qalyp, tastap ketpeýimdi ótindi. Olardyń bul tilekterin oryndamaýǵa júregim shydamady. Osylaısha men qamqorshylyqty rásimdep, olarǵa ana bolýǵa bel býdym, – dep Dılıafrýz jan-syrymen bólisti.

Dılıafrýz Kınjehanovanyń balalary

Alǵashqy kúnderden-aq balalar bir-birimen ortaq til tabysyp ketipti.

– Men barlyq balalarymdy birdeı jaqsy kóremin. Olar úshin alańdap, qorǵaýǵa tyrysamyn. Balalar da meniń jumysymnyń qıyn ári jaýapkershiligi mol ekenin túsinip, maǵan qolǵabys jasaıdy. Úı sharaýasynda únemi kómek kórsetip, janashyrlyq tanytady. Bul bizdiń bir-birimizge degen mahabbatymyz ben súıispenshiligimizdiń kórinisi, – deıdi polısııa qyzmetkeri.

Búginde Dılıafrýzdyń eki úlken uly anasynyń jolyn qýyp, polısııa qyzmetkeri bolýǵa bekingen. Olar analarynyń jumysyna qyzyǵyp, qıyndyqtarǵa qaramastan, adamdarǵa barynsha kómek kórsetýge daıyn.

– Men óz jumysymdy jaqsy kóremin. Osy jolda túsinistik tanytyp, shynaıy qamqorlyq pen jan-jaqty kómek kórsetip kele jatqan basshylyǵyma alǵys aıtamyn, – deıdi kópbalaly ana.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir