Sátbaevta buzaqylyq jasaǵan taǵy 15 adam ustaldy

Sátbaev qalasynda buzaqylyq jasaǵany úshin 15 adam ustaldy. Bul týraly Polisia.kz habarlady.

Portaldyń habarlaýynsha, 24 shildege qaraǵan túni Sátbaev qalasynda bir top azamat bes jasar qyzdy zorlady degen kúdikpen ustalǵan adamdy óz betinshe jazalaýǵa umtylǵan. Tas-taıaqpen qarýlanǵan jastar polısııa ǵımaratyna kirmek bolǵan. Polıseıler bul buzaqylyqtyń aldyn aldy.

Alaıda buzaqylyq jasaǵan adamdar jolyndaǵynyń bárin qıratqan. Qaqpany, aýladaǵy otyrǵyshtardy, qaza tapqan polısııa qyzmetkerlerine arnalǵan eskertkishti, polısııa ǵımaratynyń aýmaǵyndaǵy shamdardy, terezelerdiń áınekterin syndyrǵan. Syrtqy beınebaqylaý kameralary men qyzmet avtokóligi de búlingen.

Keltirilgen zalaldardy baǵalanyp jatyr. Qazaqstan qylmystyq kodeksiniń úsh baby ("Buzaqylyq", "Bótenniń múlkin qasaqana joıý nemese búldirý", "Quqyq qorǵaý organy qyzmetkeriniń ómirine qol suǵýshylyq") boıynsha sotqa deıingi tergeý bastaldy.

Qazirgi ýaqytta buzaqylyq áreketterdi uıymdastyrýshylar men belsendi qatysýshylar anyqtalyp, ustaldy. Ýaqytsha ustaý ızolıatoryna 15 adam qamaldy. Barlyq tergeý áreketteri qoldanystaǵy zańnama aıasynda júrgizilip jatyr.

Ishki ister organdary ustalǵandarǵa qatysty azaptaý jáne quqyqqa qarsy áreket jasaý týraly áleýmettik jelilerde taratylyp jatqan habarlamalardyń jalǵan ekenin aıtty. Mundaı negizsiz habarlamalardyń avtorlaryna qatysty qylmystyq jaýapkershilik qarastyrylǵanyn eskertti. Sátbaev qalasyndaǵy bul oqıǵada polısııa qyzmetkerleri atys qarýyn qoldanbaǵan.

Buzaqylarǵa qatysty tergeý áli jalǵasyp jatyr. Kináliler qoldanystaǵy zańnamaǵa sáıkes jazaǵa tartylady.