30 Shilde, 2020 Barlyq aımaqtar

Premer-mınıstr tapsyrmasy: Nesıe tólemi keıinge shegeriledi

Kórneki sýret

Karantınnen zardap shekken kásipkerlerge osy jyldyń qazanyna deıin kredıt tólemderin keıinge shegerý múmkindigi beriledi. Bul týraly premer-mınıstr Asqar Mamınniń tóraǵalyǵymen ótken memlekettik komıssııa otyrysynda aıtyldy, dep habarlady primeminister.kz.

Jıynda prezıdenttiń karantındi uzartý jáne odan keıingi kezeńge daıyndalýǵa qatysty bergen tapsyrmalaryn oryndaý máseleleri qaraldy.

Úkimet basshysy aldaǵy eki apta ishinde óz qyzmetin ýaqytsha toqtatqan ekonomıka salalarynyń qyzmetin qalpyna keltirý boıynsha júıeli daıyndyq jumystaryn júrgizýdi tapsyrdy. Ulttyq ekonomıka mınıstrligi múddeli memlekettik organdarmen, "Atameken" palatasymen birlesip, kásipkerlerge qoldaý kórsetý sharalaryn ázirleıdi.

Eń kóp zardap shekken salalardaǵy shaǵyn jáne orta bıznes sýbektilerine memlekettik qoldaý sharasy retinde nesıe tólemderin osy jyldyń 1 qazanyna deıingi merzimge keıinge qaldyrý múmkindigi usynylady.

Premer bıznes sýbektileriniń qyzmetine qoıylatyn sanıtarlyq-epıdemıologııalyq talaptardy bekitýdi, sondaı-aq, azamattar men kásipkerlik sýbektileriniń sanıtarlyq erejelerdi saqtaýyna tıisti baqylaý jasaýdy tapsyrdy.

Kásiporynnyń jumysyna salynǵan tyıymdy alyp tastaý algorıtmi kásipkerlerdi tirkeýdi jáne "Info Kazakhstan" elektrondy platformasynda qyzmetti qaıta bastaýǵa ótinimder qabyldaýdy qamtıdy. Ákimdik, SEQ, óńirlik kásipkerler palatasynyń qyzmetkerleri men jurtshylyq ókilderinen quralǵan komıssııa tekseris júrgizgennen keıin, bıznes sýbektilerine qyzmetin qaıta bastaýǵa elektrondy ruqsat beriledi.

Sıfrlyq damý, ınnovasııalar jáne aeroǵarysh ónerkásibi mınıstrligine indettiń aldyn alý jáne aqparattandyrýdy arttyrý boıynsha mobıldi qosymshalar engizý tapsyryldy.

Ilmek sózder: Nesıe ShOB

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir