"Erliktiń úlgisi bar": Jetisýdyń eriktileri belsendi

Qazaq qoǵamynda qaıyrymdylyq jasaý úrdisi ejelden bolǵan. Sol dana babalarymyzdyń sara jolyn jalǵap kele jatqan eriktilerdiń búgingi ilkimdi isi kópke úlgi. Kúlli álemdi dúrliktirgen indet elimizde órship turǵan ýaqytta óz erkimen aqysyz qyzmet kórsetip, qaıyrymdylyq jasap júrgen jetisýlyq eriktiler naǵyz elim degen patrıottar.

Almaty oblysy aýmaǵynda «Meıirimdi Jetisý» eriktiler front-keńsesiniń jumysy júzege asyrylyp keledi. Jyl basynda jalpy sany 1 myń 43 bolǵan oblys eriktileriniń sany kún sanap ósýde. Qazirgi tańda oblysymyzda 2 myń 77 erikti jastar tirkelip, kóptiń alǵysyna bólenip keledi.

Respýblıkalyq «Biz birgemiz» aksııasy aıasynda 2 myń 300 qaıyrymdylyq aksııalary men is-sharalar ótkizildi. Áleýmettik jaǵdaıy tómen, az qamtylǵan jáne kópbalaly otbasylar men jalǵyzbasty analarǵa, jalpy 17 myń otbasyna áleýmettik kómek kórsetilip, azyq-túlikpen qamtamasyz etildi. Oblys eriktileriniń atsalysýymen búgingi kúnde 64 myń medısınalyq betperde tigilip, 12 myń  lıtr antıseptık turǵyndarǵa jetkizildi.

Koronavırýs ınfeksııasynyń anyqtalýyna baılanysty karantınge jabylǵan 20 myńnan astam turǵyny bar «Asyl arman» turǵyn úı kesheni oblys jastary men eriktileriniń nazarynan tys qalǵan joq. «Meıirimdi Jetisý» eriktileri turǵyn úıdiń karantın jaǵdaıynda bolǵanyna qaramastan turǵyndarǵa medısınalyq betperde, gıgıenalyq zattar jáne azyq túlik jetkizip turdy.

Túrkistan oblysy Maqtaaral aýdanyna Almaty oblysynan 15 júk kóligimen 260 tonna gýmanıtarlyq kómek jetkizilgen sátte oblys eriktileri kósh basynda júrdi. Jetisý jurtshylyǵynyń aqjoltaı amanatymen óńirden 20-ǵa jýyq erikti jastar baryp, bir apta boıy qalpyna keltirý jumystaryna atsalysty. Sondaı-aq, sý tasqynynan zardap shekken otbasyn azyq-túlik jáne ózge de qajetti zattarmen qamtamasyz etip otyrdy.

Erikti jastar gýmanıtarlyq kómek jınalǵan qoımalarǵa kúnine 300-350 tonna azyq-túlik, 250 tonna qurylys zattaryn túsirip qana qoımaı mektep-ınternattarǵa ornalastyrylǵan turǵyndardyń, balalardyń kóńilin aýlaý maqsatynda mýltfılm jáne kıno kórsetilim uıymdastyrdy. Balalarǵa bazarlyq ta taratyldy.

14 mamyr kúni qatty jaýyn áserinen Túrkistan oblysynyń birneshe aýyldaryn sý basqany bárimizge belgili. Osy kezde Jetisýdyń eriktileri oqıǵa ornyna birinshi bolyp kómekke bardy. Tóle bı aýdany, Leńgir qalasy jáne Kıelitas aýylynyń turǵyndaryn evakýasııalaý jumysyna qatysyp, otandastarymyzǵa kómek kómek qolyn sozdy.

Qazirgi tańda oblys eriktileri kúsh biriktirip, medısınalyq qural-jabdyqtarmen qamtamasyz etýge atsalysýda. Sonymen qatar, dárigerlerge qymyz taratý, avtoeriktiler turǵyndarǵa dári-dármek jetkizý isi de qolǵa alynǵan. Búgingi kúni óńirde 70-ke jýyq avtoerikti bar. Olar kún demeı tún demeı naýqastarǵa qajetti dári-dármekti, as-aýqatty jetkizip berýde.

Jasyratyny joq, elde karantın jarııalanǵan sátte-aq azyq-túlik tapshylyǵy bolady degen halyqtyń bazar men dúkennen jappaı tamaq satyp alý úshin kezekke turǵanyn kórgenbiz. Úkimet pen jergilikti atqarýshy bılik tarapynan aıtylǵan túsindirý jumystaryna qulaq aspaǵan halyqtyń alańdaǵan kóńilin óz paıdasyna jaratyp, taýaryn qymbattatqan satýshylar qatary da kóp kezdesti. Osyndaı syn sátte jetisýlyqtardyń atqarǵan eren eńbegin erekshe atap ótkenimiz jón. Eriktiler reıdke kóp shyǵyp, turǵyndarǵa tyǵyz sharýasy bolmasa úılerinde otyrýǵa keńes berip, betperde taǵyp júrýdiń mańyzyn túsindirýdi óz mindetine alǵan.

«Biz birgemiz» Respýblıkalyq aksııasy boıynsha atqarylǵan is birshama. Oblys boıynsha úlken is tyndyrǵan birneshe aýdannyń eriktilerin tilge tıek etkendi jón sanadyq. Aqsý aýdanynyń erikti jastary áleýmettik turmys jaǵdaıy tómen 370  otbasyna azyq-túlik retinde kómek kórsetti. Atalǵan otbasylarǵa aýdan demeýshileri 1 mıllıon 250 myń teńgege kómek kórsetti. «Jaqsylyq jasap jarysaıyq» aksııasy aıasynda aýyl jastary Aqsý aýdanynyń ortalyq aýrýhanasynda Covid-19 juqpasymen aýyryp jatqan naýqastar men aq halatty darigerlerge 200 lıtr shubat, qymyz jetkizdi. Qoı etin, 50 qap un jáne qajetti azyq-túlikpen qamtamasyz etti. Aqsý aýdanynyń erikti jastary jáne áleýmettik bloger Danııar Beıisqalı men Merýert Dúpbaevanyń bastamasymen arnaıy qarajat jınap, aýdandyq ortalyq aýrýhanaǵa 5 ponsentrattyq apparatqa tapsyrys berdi. Búginde 2 apparat aýrýhana basshylaryna tabystaldy. Qalǵan 3 apparat aldaǵy ýaqytta jetkizeletin bolady. Aýdan turǵyndary úshin 700 myń teńgege qajetti dári-dármek jetkizildi. «Shýaq» eriktileri Jansúgir aýylynyń turǵyndaryna aýdan kásipkerleri men ájeler qaýymdastyǵynyń kómegimen tigilgen 2 myń 500  medısınalyq betperdeni tegin taratty. Aqsýlyq eriktiler aýdan boıynsha úı karantınde oqshaýlanǵan 18 otbasyna kúndelikti qajetti azyq-túlik zattaryn  jetkizip turýdy qolǵa alǵan.

Eńbekshiqazaq aýdanynyń eriktileri osy kúnge deıin 13 mıllıon 300 myń teńge kóleminde 900 otbasyn azyq-túlik jáne medısınalyq betperdemen qamtamasyz etti. Aýdannyń jomart azamattary jas búldirshinniń otasyna qajetti 500 myń teńgeni qaıyrymdylyq esebinde tartý etip, aǵdaıy tómen otbasynyń  jaldamaly páteriniń 2 aılyq tólemine kómektesti. Osyndaı qıyn kezeńde ómir úshin kúresip jatqan emdelýshi azamattarmyzǵa kerekti ottegi konsentratoryna qajetti qarajatty jınap, aýdandyq aýrýhanaǵa 6 ottegi konsentratoryn tabystady. «Búgingi kúnniń batyrlary» atty aksııa aıasynda aq halatty abzal jandarǵa 150 lıtr qymyz usynyldy. Bul ıgi bastama aldaǵy ýaqytta da óz jalǵasyn taba bermek.

Aqyndar men batyrlar eli  Jambyl aýdanynda 100 jas erikti óz erkimen jumys isteıdi. Budan ózge aýdanda 30-dan astam eriktilik toptar qarqyndy jumys atqarýda. Aıta keter bolsaq, «Ardagerlerdi ardaqtaıyq», «Qaıyrymdylyq qadirli is» «Taza aýdan – taza aýyl» aksııalar únemi atqarylyp turady. Tótenshe jaǵdaı kezinde aýdandaǵy áleýmettik jaǵdaıy tómen az qamtylǵan  5 myń 500  otbasyǵa aýdandaǵy jáne shet qalalardaǵy jeke kásipkerler jáne  aýqymdy mekemeler tarapynan azyq-túlik jetkizildi. Aýdan turǵyndaryna 3 myń dana medısınalyq betperde tegin úlestirildi. Qaıyrymdylyq sharasyna qoldaý kórsetken «Halyq» qaıyrymdylyq qory, «Táýekel Gaz» JShS, «Plast-Invest» JShS, «Majıtova» JShS, «Kusto Group» kompanııasy, «Jambyl» RES, «Tabys» ShQ, «Jaqsylyq» ShQ, aýdandyq jumyspen qamtý ortalyǵy, «Jetisý» JK, aýdandyq tótenshe jaǵdaılar bólimine eriktilerdiń aıtar alǵysy mol.

Uıǵyr aýdanynyń jastary ótkizgen aksııada 240 otbasyna kómek kórsetti. Shonjy aýylynyń eriktileri Maqtaaral óńirindegi turǵyndarǵa kómek retinde 2 mıllıon sommaǵa 2 júk kóligimen 150 dana matrats, 3 tonna un, 100 kg makoron ónimderin, 50 blok sý, gıgıenalyq taýarlar joldady.

Eriktilerde erliktiń úlgisi bar. О́ıtkeni olar eli úshin qolda baryn aıamaı, qaltyqsyz qyzet etedi. Al tótenshe jaǵdaıdy sebep qylmaı, elge tegin qyzmet kórsetip júrgen jetisýlyq volonterlerdiń ıgi isi erlikpen para-par.

Aıdar QALIEV

Almaty oblysy