Jomart jandar Taldyqorǵan qalasynyń aýrýhanasyna 10 apparat syıǵa tartty

"Birlik bar jerde tirlik bar" degen ataly sóz dál búgingi kúnge arnap aıtylǵandaı. Birliktiń, tatýlyqtyń arqasynda ǵana qazaq bul indetti jeńip shyǵatyny anyq. Bir atanyń balasyndaı birigip, eldiń amandyǵyn oılaǵan qaıyrymdy azamattardyń qamqorlyǵynyń nátıjesinde Taldyqorǵan qalasynyń aýrýhanalaryna ókpeni jeldetetin 10 apparat syıǵa tartyldy.

Eldiń erteńi úshin alańdaǵan atymtaı jomart azamattar halyq ıgiligi úshin 5 mıllıonnan asa qarajat jınaǵan. Jeke kásipker Dáýren Tálipovtiń aıtýynsha, bul shara osymen toqtap qalmaıdy. Halyq qazirdiń ózinde bir aýyzdan jınalyp, 70 apparattyń qunyn shyǵaryp qoıǵan. Shamamen 10 kúnniń ishinde apparattar taratylmaq. Bul qaıyrymdylyq sharasyna barsha qazaqstandyq shamasy kelgenshe atsalysqan. Iá, meırimdi jannyń barlyǵy bir mezette jumylyp kúresse bul indetten arylatynymyz anyq.

Almaty oblystyq aýrýhananyń dırektory Murat Rahmetov el basyna aýyr kún týǵanda judyryqtaı jumylyp úlken is tyndyryp júrgen azamattarǵa rızashylyǵyn bildirdi.

– Dál qazir aq halatty abzal jandar adam janyn arashalaý úshin indetpen kúresip júr. Bul maıdan óte qaýipti. Biraq, sizderdiń qoldaýlaryńyz ben meıirimdilikterińiz erteńgi kúnge degen úmitimizdi eselep jatqanyn erekshe atap ótkim keledi. Kún saıyn qaıyrymdy jandar aýrýhanaǵa as-aýqat, sýsyn, qymyz alyp keledi. Álemdi meıirimdilik qutqaratynyna osy joly taǵy da kóz jetkizdik. Kúni keshe ǵana aýrýhana tósegine óte aýyr halde túsken naýqas dertten aıyǵyp, úıine oraldy. Eki aı emdelip, óz aıaǵymen jaqyndaryna oralǵan azamat úshin biz qatty qýandyq. Janyna arasha surap, bizden qoldaý kútip kelgen ár naýqas jaqyndarymen jaqsylyqta tabyssa eken dep tileımiz. Aq halattylardyń armany – adamzattyń saýlyǵy. Birliktiń, tatýlyqtyń arqasynda bul maıdandy da jeńetinimiz anyq. О́zderińizdi, jaqyndaryńyzdy qorǵańyzdar degim keledi. Sizdiń jaýapkershiligińiz – eldiń amandyǵy ekenin esten shyǵarmańyz, – dedi aýrýhana dırektory.

Taldyqorǵan qalasynda pandemııa kezindegi is-qımyldardy úılestirý jónindegi shtab quryldy. Onyń quramynda qoǵam qaıratkerleri men aýrýhanalardyń bas dárigerleri bar.

Aıdar QALIEV

Almaty oblysy