Ashat Aımaǵambetov: Oqý aqysyn kótermeýdi suraımyn

Bilim jáne ǵylym mınıstri Ashat Aımaǵambetov JOO basshylaryna bıylǵy oqý aqysyn kótermeýdi jáne qaryzy bar stýdentterge bólip tóleý múmkindigin berýdi surady. 

– Pandemııanyń saldarynan stýdentter oqý aqysyn ýaqytyly tóleı almaı otyr. Jalpy ekonomıkalyq ahýaldy ózderińiz kórip otyrsyzdar. Sondyqtan JOO taraptarynan qoldaý jumystary júrgizilý qajet dep sanaımyn. Osy tusta eki máselege toqtalǵym keledi. Birinshiden, qaryzy bar stýdentterge bólip tóleý múmkindikterin qarastyrýlaryńyzdy suraımyn. Ekinshiden, bizge kelip túsken aqparattarǵa sáıkes, biraz JOO-lar qazir oqýdyń baǵasyn kóterýdi josparlap otyr eken. Sondyqtan bul másele boıynsha da sizderge degen bir ótinishim bar. Qazirgi ahýaldy eskere otyryp, joǵary oqý oryndarynda baǵany ósirmeýdi suraımyn. Bul – óte mańyzdy. Bul máseleni qarastyryp, tıisti sheshim qabyldaıdy dep senemin, – dedi Ashat Aımaǵambetov.

Buǵan deıin mınıstr JOO-nyń aqyly bóliminde oqıtyn stýdentterge oqý aqysyn arzandatýdy mekeme orny ózi sheshedi dep aıtqan bolatyn.

Qyrkúıek aıynda ýnıversıtetter pen kolledj stýdentteri qashyqtan oqıdy.