Qaraǵandydan 20 shaqyrym jerdegi Baıqadam aýylynda ınternet joq. Oqýshylar qashyqtan qalaı oqymaq?

"Qamshy" portalyna Qaraǵandy oblysy Buqar jyraý aýdany Baıqadam aýylynyń Edige Radolda esimdi turǵyny aýyldarynda uıaly baılanys pen ınternet múlde joq ekenin, sonyń saldarynan onlaın oqýǵa daıyn emestigin jazyp hat joldady. Sózinshe, pandemııa bastalǵan kezde aýyldaǵy oqýshylar men stýdentter ınternettiń joqtyǵynan qatty zardap shekken. Oqyrman máseleni qaǵazǵa syzyp, Baıqadam aýylynyń uıaly baılanys bar eki aýyldyń ortasynda turǵanyn kórsetken. Edige Radolda hatynyń tolyq nusqasy tómende usynylyp otyr.

Oqý jyly jaqyndap qaldy. Birinshi toqsandy balalar qashyqtan oqytýǵa jumsaıtyny belgili. Aýyldaǵy mektep oqýshylarynyń oqýǵa degen talpynysy zor, biraq úı tapsyrmasyn oryndap muǵalimderine jiberý úshin balalar shatyrǵa kóterilip ​​uıaly baılanysy bar jerdi izdeýge májbúr.
⠀
Balalardy qashyqtyqtan oqytý úshin turaqty jáne sapaly ınternetpen qamtamasyz etý kerek. Qaraǵandy qalasynan nebári 20 shaqyrym jerde ornalasqan aýyldy uıaly baılanys nemese ınternetpen qamtamasyz ete almaı otyrǵan aýdan men oblys basshylaryna úlken syn bolýǵa tıis.
⠀
Qaraǵandy ​​oblysynyń bilim basqarmasy bul másele olardyń baqylaýynda ekenine jáne jaqyn arada sheshiletinin jyldar boıy aıtyp keledi, biraq áli ózgeris joq.

Internettiń joqtyǵy ýnıversıtet/kolledjderde oqıtyn stýdentterge de aýyr tıip tur. Olardyń keıbiri amalsyzdan qaladan páter jaldap, sol jerde ınternetpen oqýǵa májbúr. Aýyl turǵyndary amalsyzdan úılerine 20-60 myń teńgege uıaly baılanys kúsheıtkishin satyp alyp, ornatqan edi. Biraq odan kútkendeı nátıje bolmady. Uıaly baılanys pen ınternettiń joqtyǵynan kúzde aýyl mektebi balalardy mektepte oqytýdy josparlap, qazir muǵalimder soǵan oraı jumys jasap jatyr eken. Qalaǵa baryp-kelip jumys isteıtin ata-analar bar. Olar qaladan vırýs juqtyryp alý qaýpi bar. Kúzde vırýstyń ekinshi tolqyny órshıtin shaǵynda mektepke barý vırýstyń taralýyn órshitip jiberýi ǵajap emes.

Aýylǵa munara qoıyp, osy máseleniń aldyn alýǵa bolatyn sııaqty ǵoı, biraq olar (jaýapty laýazym ıeleri – red.) basqasha oılap, jaǵdaıdy qıyndatyp jiberetini ókinishti-aq.

P.S. Qaraǵandy oblysynyń bilim berý basqarmasy aýyldaǵy máseleden habardar. Ol jerdegiler Baıqadam aýylynda jelilik baılanystyń joqtyǵyn moıyndap otyr. Máseleni sheshý úshin ınternet júrgizetin provaıderge eldimekendi ınternetpen qamtamasyz etý týraly talap qoıyp, hat joldanǵan. Basqarmadaǵylar máseleni baqylap otyratyndaryna sendirýde.