"Qazaqsha jaz" qozǵalysy Samsung pen KFC-di qalaı qazaqsha sóıletti?

Sońǵy 5-6 kúnde áleýmettik jelide "Qazaqsha jaz" qozǵalysy paıda boldy. Qozǵalys belsendileri eldegi iri kompanııalardyń áleýmettik jelidegi paraqshasynda orys tilimen qatar qazaqsha da málimet berýin mádenıetti túrde surap, másele kóteredi. Nátıjesinde birneshe mekemeniń paraqshasyn qazaqsha sóıletti. Qamshy tilshisi qozǵalys uıymdastyrýshylarynyń birimen suhbattasty (esimin atamaýdy ótindi). 

"Qazaqsha jaz" qozǵalysyn qurýshynyń biri qozǵalystyń qalaı qurylǵany jaıly baıandap berdi.

– Bul qozǵalys 20 shilde kúni quryldy. Qozǵalysty qurý ıdeıasy Instagram áleýmettik jelisinde birneshe belsendiniń "Qazaq Republic" kıim brendi kompanııasynyń paraqshasyna jazylǵan talap-tileginen bastaldy. Olar kompanııa paraqshasyna "Málimetter nege tek orys tilinde jazylǵan? Qazaqsha jazbalar nege joq?" dep sypaıy túrde pikir qaldyrady. Keıin dúkenniń basshylyǵy talaptardy nazarǵa alyp, paraqshany qazaq tilinde de júrgize bastaıdy. Osydan soń, biz, tutynýshylar mádenıetti túrde óz talabymyzdy qoısaq, nátıje beretinine kózimiz jetti. О́zimiz sekildi qazaqsha aqparatqa sýsap júrgen adamdardyń basyn qosyp, Telegram arnasynan arnaıy chat ashtyq. Qazaqstandaǵy iri kompanııalardyń bárinen qazaqsha da aqparat berýin, áleýmettik jelidegi paraqshalaryn qazaqsha da júrgizýin suraýdy josparladyq. Bir kúnde topqa 300-deı adam jınaldy, – deıdi ol.

Ol qozǵalysty qurýdy asa keremet ıdeıa dep oılamaıtynyn jetkizdi.

– "Qazaqsha jaz" qozǵalysyn qurý keremet ıdeıa dep oılamaımyn. Til máselesi bizdiń qoǵamda pisip jarylaıyn dep turǵan jara ekeni anyq. Bárimiz de eldegi iri kompanııalardyń tutynýshysymyz. Samsung-tyń gadjetin paıdalanamyz, Glovo arqyly tamaqqa tapsyrys beremiz degendeı. Osyndaı iri bıznes áleminiń de óz oılaǵany bar shyǵar. Taýar satyp, ónim shyǵaratyn kompanııalar tutynýshylarymen baılanysty kóbine orys tilinde júrgizedi. Bizge osy sıtýasııa unamaıdy. Eldegi iri kompanııalar ár adamnyń qazaqsha da aqparat alýǵa quqy bar ekenin túsinse deımiz, – dedi qozǵalys qurýshylarynyń biri.

Onyń aıtýynsha, qozǵalystyń qurylǵanyna bir apta tolmasa da nátıjesi kóńil qýantady. Qozǵalystyń talap etýimen eldegi iri Samsung, KFC, Qazaq Republic, Glovo, Chocofamily, LG sekildi kompanııalar áleýmettik jelidegi paraqshasynda qazaqsha da aqparat bere bastady.

– Qazaqsha aqparat berýin talap etýimiz Qazaq Republic kıim brendinen bastaldy. Qazir olar sıpattamasyn da qazaqsha jazatyn boldy. Qazaqsha-oryssha posttar sala bastady. Odan keıin Samsung kompanııasynan qazaq tilinde de aqparat berýin suradyq. Olar da ótinishimizge qulaq asty. Áleýmettik jelidegi paraqshasyn qazaq tilinde júrgize bastady. Budan soń qozǵalys músheleri KFC, Glovo kompanııalarynan paraqshasyn qazaqsha júrgizýdi surady. Bul maqsatymyz da oryndaldy. Kelesi mejemiz eldegi "Chocofamily" degen iri holdıng boldy. Olardyń Álisher Elikbaev atty ókilimen kelissóz júrgizdik. Arnaıy mamandar izdestirip jatqanyn aıtyp, qazaqsha da aqparat beretinine ýáde berdi. Odan soń LG kompanııasy da áleýmettik jelidegi paraqshasyn qazaqsha júrgizýdi qolǵa aldy, – dep qozǵalystyń jetistikterin atap ótti ol.

Qozǵalys ókiliniń aıtýynsha, belsendiler suranysyn eleýsiz qaldyryp otyrǵan kompanııalar da bar.

– Áleýmettik jelide paraqshasyn qazaqsha júrgizýdi surap, pikir jazsaq ta elemeı otyrǵandar bar. "Starbucks Qazaqstan" men "Mechta" kompanııalarynan jelidegi jazbalaryn qazaqsha da jazýyn suradyq. Jekemizge "О́tinishterińizdi basshylyqqa jetkizdik" degen jaýap qaıtardy. Alaıda áli kúnge deıin paraqshalarynda aqparatty qazaqsha bermedi. Al Tehnodom ara-tura qazaqsha jazyp júr. Bizdiń talap-tilegimizdi oryndamaǵan mekemeler qazaq tilindegi aqparattardy turaqty bermeıinshe, maqsatymyzdan bas tartpaımyz, – deıdi ol.

Onyń sózinshe, "Qazaqsha jaz" qozǵalysynyń baǵytyn qoldap, kómektesip jatqandar az emes.

– Bizdiń ıdeıamyzdy qoldaıtyn, iske asyratyn adamnyń kez kelgeni – demeýshi. Bul – qoǵamdyq shara, ýaqytyńyzdy ǵana bólip jasaıtyn nárse. Al rýhanı turǵyda kómektesip jatqan adamdar bar. Áleýmettik jelidegi paraqshasynda júz myńdaǵan oqyrmany bar adamdar bizdi qoldap jatyr. Qozǵalysqa qosylyp jatqan óner adamdary da barshylyq. Jaqyn arada "mega juldyzdarymyz da" qatarymyzǵa qosylady dep úmittenemin, – dedi ol.