AQSh dıplomattary Qytaıdaǵy konsýldyǵynan shyǵaryldy

72 saǵattyq eskertý merzimi aıaqtalǵannan keıin amerıkalyq dıplomattar Qytaıdyń Chendý qalasyndaǵy konsýldyǵynan ketti.

О́tken aptada Tehas shtatynyń Hıýston qalasyndaǵy Qytaı konsýldyǵynyń jabylýyna jaýap retinde Qytaı Chendý qalasyndaǵy Amerıkanyń konsýldyǵyn jabýǵa buıryq bergen.

Dúısenbi kúni eskertýdiń sońǵy merziminen buryn qyzmetkerlerdiń ǵımarattan ketip jatqany kóringen, taqtalar alynyp, AQSh jalaýy túsirilgen.

Qytaıdyń syrtqy ister mınıstrligi ǵımaratqa qytaılyq qyzmetkerler sońǵy merzimnen keıin kirip, konsýldyqty "qabyldap aldy" dep málimdegen.

Sońǵy ýaqytta AQSh pen Qytaı arasynda shıelenis kúsheıe tústi. Qurama Shtat prokýrorlarynyń sotqa bergen málimetteri boıynsha, Amerıkadaǵy qytaı zertteýshileri vızalyq alaıaqtyǵy úshin qamaýǵa alynǵan. Vashıngton "vızalyq alaıaqtyq jasady jáne áskerı baılanystardy jasyrdy" dep kúdiktengen qytaı ǵalymy San-Fransıskodaǵy Qytaı konsýldyǵyna qashyp tyǵylǵanyn málimdegen.

Sársenbide Tramp ákimshiligi Qytaıdyń Hıýstondaǵy konsýldyǵyn 72 saǵat ishinde jabýǵa buıryq bergen.

AQSh memlekettik hatshysy Maık Pompeo Vashıngtonnyń sheshimi Qytaıdyń zııatkerlik menshikterdi "urlap jatqandyǵyna" baılanysty qabyldanǵanyn málimdegen.

Beıjiń bul qadamdy "saıası arandatýshylyq" dep ataǵan.

Biraq Tramp Qytaı konsýldyqtarynyń kóbin jabýǵa buıryq beretini "árqashan múmkin" ekenin málimdegen.

Keıinirek Qytaı Chendý qalasynda ornalasqan AQSh konsýldyǵyn jabýǵa buıryq bergen. Qytaı bul qadamdy AQSh-qa "qajetti jaýap" dep atady. Senbide Beıjiń Hıýstondaǵy Qytaı konsýldyǵyna AQSh quqyq qorǵaý organdary qyzmetkerlerinń "májbúrli túrde" basyp kirgenin aıtyp aıyptap, oǵan da tıisti qaıtarma áreket jasaıtynyn málimdedi.

Vashıngton Beıjińdi saýda jáne koronavırýstyq pandemııaǵa qatysty birneshe ret aıyptaǵan, sondaı-aq Qytaı Gonkongqa qaýipsizdik týraly daýly jańa zań qabyldady.

Al Tramp Qytaıdyń Shyńjań provınsııasyndaǵy etnıkalyq qazaqtar men uıǵyrlardyń qysymǵa ushyraýyna qatysy bar 50-ge jýyq qytaılyq kompanııaǵa sanksııa saldy.