Almatynyń zııaly qaýym ókilderi qala turǵyndaryna úndeý jasady

Elde qalyptasqan jaǵdaıǵa baılanysty Qazaqstannyń zııaly qaýym ókilderi el turǵyndaryna arnap úndeý joldady. Olardyń arasynda qazaq jazýshysy jáne kınodramatýrg, Qazaqstan Jazýshylar odaǵynyń múshesi, Qazaqstannyń eńbek sińirgen qaıretkeri Smaǵul Elýbaı, akter, teatr jáne kıno rejısseri Asanáli Áshimov, Qazaqstan Jazýshylar odaǵynyń tóraǵasy Ulyqbek Esdáýlet bar.

«Buryn sońdy bolmaǵan osyndaı náýbet kezinde birigeıik. Birlesip jumys isteıik, bir-birimizdi tyńdaıyq. Joǵarydan berilip jatqan málimetterdi oryndaıyq. Qart býynǵa men senem, olardyń tártibine senemin. Men mynaý jastarǵa kóńil aýdaryp otyrmyn. Qalaı bolsa solaı júrip, maskasyz júrip, toılar jasap, jıyndar jasaýdy doǵarý kerek ýaqytsha. Toılaıtyn ýaqyt alda», — degen Asanáli Áshimov el osynaý kúrdeli jaǵdaıdan shyqqanda qýanyshty sátterdi atap ótetin kezder kóp bolatynyn atap ótti.

«Barlyǵy adamnyń aqylyna baılanysty. Memleketimizdiń baılyǵy – halyq. Halyq baılyǵy – el baılyǵy. Sondyqtan árqaısymyz bir-birimizge adal bolaıyq, ár ýaqytta bir-birimizge qorǵanysh bolaıyq. Saqtaıyq bir-birimizdi, ol úshin tártip kerek. Osyny qolǵa alaıyq», — dep úndeý tastady Asanáli Áshimov.

О́z kezeginde aqyn, jýrnalıst jáne redaktor Ulyqbek Esdáýlet te qala turǵyndarynan epıdemıologııalyq talaptardy saqtap, óz densaýlyqtaryna beı-jaı qaramaýǵa shaqyrdy.

«Álemdi titirentken koronavırýs indeti bizdiń halqymyzǵa da qyrǵıdaı tıip, shetinen baýdaı túsirip jatyr. Kúnde estıtiniń qaraly habar, azaly sózder. Halqymyzdyń nebir atpal, abzal azamattary, qaıratker tulǵalary, daryndy, talantty adamdary beımezgil dúnıeden ótip jatyr. Qaraly shańyraqtar, azaly otbasylar kúnnen kúnge kóbeıip bara jatyr. Sondyqtan biz saqtyq sharalaryn qaıtadan kúsheıtýimiz kerek, biz endi bulaı qarap otyra berip, shybynsha qyryla berýge bolmaıdy. Medısınany memleket qolyna alyp, bárin tirtipke keltirip jatqan kezde dári-dárimekti, gýmanıtarlyq kómekterdi,jedel járdemdi, aýrýhanalardy jóndep jatqan kezde biz de ózimiz saqtyq sharalaryn saqtap, medısınalyq normalardy saqtap, indetti jeńýge bir kisideı at salysaıyq», — dedi Ulyqbek Esdáýlet.

Sonymen birge, ol kóp adamdardyń jınalýymen toı, saltanatty sharalar men basqa jıyndardyń áli de ótkiziletinin aıtyp, el azamattarynan osyndaı sharalardy ýaqytsha ótkizbeı turýǵa shaqyrdy.

«Baıaǵyda shaqyrǵan jerden qalma deýshi edi, qazirgi kezde shaqyrǵan jerge barma deıtuǵyn mátel paıda boldy. Sonda da qoımastan bizdiń aramyzda, aýyldarymyzda, qalalarymyzda tyǵylyp toı jasaý, tyǵylyp súndet toı, basqa da qyz uzatý, kelin túsirý, týǵan kún degen dúnılerdi, tipti bir túngi klýbtarǵa jınalyp alyp, bolmasa, taýǵa baryp tyǵylyp toı-tomalaq ótkizý ádeti áli de tyıylmaı tur. Sonyń bárin pyshaq kesti toqtatý kerek, áıtpese biz osyndaı tártipsizdik áreketterimizben, normalardy saqtamaý áreketterimizben koronavırýs sııaqty dushpanǵa kómektesken bolyp shyǵamyz. Sondyqtan myń jerden qazaqtyń toıǵa barmasa uıat, toı bolmasa uıat, qonaq shaqyrmasa uıat, qonaqqa barmasa uıat deıtin ádetterine qazaqtyń uıaty kináli bolsyn degen oımen jazyp, taratyp jatqandar bar. Menińshe bul durys emes. Qazaqtyń uıatyna tıispeý kerek. Qazaqtyń ar-uıaty árqashanda bıikte. Munyń sebebin izdeıtin bolsaq, uıattan emes, uıatsyzdyqtan, tártipten emes, tártipsizdikten izdeýimiz kerek. Sondyqtan qashan da saqtyq sharalaryn abaılap, medısınalyq normalardy qoldanyp, barlyǵyna da abaı bolaıyq. Úmitpen ómir súreıik, senimmen kún kesheıik! Aman-saý júzdeseıik degim keledi», — dedi Ulyqbek Esdáýlet.