24 Shilde, 2020 NEWS

Toqaev Shornaq aýyly men Sátbaev qalasyndaǵy jaǵdaıǵa baılanysty keńes ótkizdi

Foto: akorda.kz

Prezıdent Q.Toqaev Túrkistan oblysy Shornaq aýyly men Qaraǵandy oblysy Sátbaev qalasyndaǵy oqıǵalarǵa baılanysty keńes ótkizdi. Oǵan prezıdent ákimshiliginiń basshysy, Túrkistan jáne Qaraǵandy oblystarynyń ákimderi, quqyq qorǵaý organdarynyń basshylary qatysty. Bul týraly prezıdenttiń baspasóz hatshysy Berik Ýálı habarlady.

"Der kezinde qabyldanǵan sheshimderdiń arqasynda Shornaq aýyly men Sátbaev qalasyndaǵy jaǵdaı turaqtaldy. Tártipsizdiktiń qaıtalanýyna eshqandaı sebep joq. Prezıdent jaǵdaıdy baqylaýda ustap, jergilikti turǵyndar arasynda túsindirý jumystaryn júrgizýdi, el ishindegi turaqtylyqty buzýǵa talpynǵan arandatýshylardyń aldyn alýdy, quqyq buzýshylardy zań aıasynda jaýapkershilikke tartýdy tapsyrdy. Sonymen qatar ol atalǵan aımaqtardaǵy halyqtyń eń basty áleýmettik-ekonomıkalyq qajettilikterine nazar aýdarý kerek ekenin aıtty. Al quqyq qorǵaý organdaryna kámelet jasyna tolmaǵan qyzdy zorlamaq boldy degen kúdikpen ustalǵan Sátbaev qalasynyń turǵynyna qatysty tergeý jumystaryn jan-jaqty júrgizip, onyń qorytyndysy týraly jurtshylyqqa naqty aqparat berý týraly tapsyrma berdi" delingen Berik Ýálıdiń facebook-taǵy jazbasynda.

Keshe, Túrkistan oblysy Kentaý qalasyna qarasty Shornaq aýylynda aýyl turǵyndarynyń arasynda tóbeles bolǵany habarlandy. Atalǵan jaıt boıynsha tórt adam ustalyp, olardyń ekeýi qamaýǵa alyndy.

Áleýmettik jeli qoldanýshylary tóbelestiń ultaralyq sıpaty bar ekenin, janjal qazaq-ózbek arasynda bolǵanyn aıtsa, jelgilikti polısııa departamenti taratqan habarlamada "Shornaq aýylynda turmystyq janjal boldy" delingen.

Al 23 shildede keshki saǵat 9-da Sátbaev qalasyndaǵy ishki ister basqarmasyna 5 jasar qyzdyń joǵalǵany týraly aryz túsken.  Jedel izdestirý nátıjesinde búldirshin qaladaǵy bir úıden tabyldy. Jas qyzdy zorlady degen kúdikpen bir adam qamaýǵa alynǵan.

Artynsha, ustalǵan azamat úıiniń janyna bir top adam jınalyp, kúdiktini berýdi talap etken. Ákimdik osyǵan baılanysty quqyq qorǵaý organdarynyń qyzmetkerleri jumyldyrylǵanyn habarlady.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir