Almatylyq medısına qyzmetkerlerine 1,6 mlrd teńge ústemaqy tólendi

Almaty qalasynda koronavırýs epıdemııasyna qarsy kúres sharalaryna 9 mıllıard teńgege jýyq qarjy bólingen. Bastapqy jospar boıynsha onyń 5,5 mıllıard teńgeden astamy koronavırýsqa qarsy kúresip jatqan densaýlyq saqtaý salasy qyzmetkerlerine qosymsha ústemeaqy retinde tólenýge tıis bolatyn.

– Qazirgi tańda ústemeaqyǵa bólingen soma birshama artyp, 6,68 mlrd teńgege jetti. Buǵan aýrýhanalarda ashylǵan qosymsha tósek-oryn sany men koronavırýsqa qarsy kúreske jumyldyrylǵan qyzmetkerlerge tólenetin somanyń artýy túrtki bolyp otyr, – dedi «Áleýmettik medısınalyq saqtandyrý qory» KEAQ Almaty qalalyq fılıalynyń dırektory Tileýhan Ábildaev.

Habarlamaǵa súıensek, vırýsqa qarsy kúreske qatysyp jatqan medısına nysandarynyń tizimin Almaty ákimdigindegi arnaıy komıssııa bekitken. Bekitilgen tizimge sáıkes, naýryz-mamyr aılarynda  medısına mamandaryna 4,3 mlrd teńgege jýyq qarajat tólendi.  Jalpy alǵanda:

Qaýip deńgeıi asa joǵary 1-topqa – 1,6 mlrd teńge;

Qaýip deńgeıi joǵary 2-topqa – 1,9 mlrd teńgeden astam;

Qaýip deńgeıi ortasha 3-topqa – 689 mln.teńgeden astam ústemaqy berildi.

Fılıal málimetinshe, maýsym aıynda ońtústik astana boıynsha 5441 medısına mamanyna 1,8 mlrd teńgeden astam ústemeaqy alady. Onyń ishinde:

Qaýip deńgeıi asa joǵary 1-topqa – 871,1 mln teńge (barlyǵy 1407 adam);

Qaýip deńgeıi joǵary 2-topqa – 710,2 mln teńgeden (2498 adam);

Qaýip deńgeıi ortasha 3-topqa – 227,5 mln teńge (1536 adam).

– Qazirgi tańda 1 mlrd teńge kóleminde qosymsha ústemaqy tólendi. Onyń 608,8 mln teńgesi jedel járdem qyzmetine tıesili. Sonymen qatar, ınfeksııalyq, provızorlyq jáne karantındik tósek-oryn uıymdastyrylǵan stasıonarlar, emhana qyzmetkerlerine (fıltrler, 4-sanattaǵy jedel járdem shaqyrtýlary, laboranttardan quralǵan mobıldi brıgadalar) 1,2 mlrd teńge tólendi. Jalpy alǵanda, 913 dáriger, 2677 orta býyn medısına qyzmetkeri, 980 kishi personal, ózge de 871 qyzmetker (sonyń ishinde jedel járdem qyzmetiniń 803 júrgizýshisi) útemaqy aldy, – dep qosty Tileýhan Ábildaev.

Aıtýynsha, qazirgi tańda qalada epıdemııaǵa qarsy is-sharalarǵa 92 densaýlyq saqtaý nysany jumyldyrylǵan, onyń 74-i – emhana.

Esterińizge sala ketsek, qosymsha tólemder densaýlyq saqtaý salasy qyzmetkeriniń ómirine tóndiretin qaýip deńgeıine qaraı tólenedi. 

• Birinshisi – qaýip deńgeıi asa joǵary top. Oǵan ınfeksııalyq stasıonarlar men jansaqtaý bólimderiniń dárigerleri, aǵa jáne orta býyn medısına qyzmetkerleri jatady.
• Ekinshisi – qaýip deńgeıi joǵary top. Oǵan provızorlyq stasıonarlarda jumys isteıtin mamandar, jedel medısınalyq járdem, sanıtarlyq avıasııa qyzmetiniń dárigerleri men feldsherleri kiredi.
• Úshinshisi – qaýip deńgeıi ortasha top. Oǵan karantındik stasıonarlardyń dárigerleri, orta jáne kishi medısına qyzmetkerleri, sanıtarlyq dárigerler (memlekettik qyzmetkerler), jedel járdem kóliginiń júrgizýshileri t.b. jatady.