21 Shilde, 2020 NEWS

Bas redaktorlar klýby telearnadan "sekeńdegen" tok-shoýlardyń kórsetilýine qarsy

old.baq.kz

Qazaqstan bas redaktorlar klýby buqaralyq aqparat quraldaryna: telearnalar men ınternet basylymdarǵa, áleýmettik jelidegi jekemenshik saıt ıeleri men blogerlerge úndeý jarııalady. Bul týraly bas redaktorlar klýbynyń jetekshisi Bıbigúl Jeksenbaı jelidegi paraqshasynda jazdy.

"Búgingi tańda búkil álem emi tabylmaı otyrǵan qaýipti indettiń taralýynan sheti men shegi kórinbeıtin, taýdaı tolqyndary doldana týlaǵan teńizde tórt qubylasynan tynyshtyq tappaı teńselgen kemedeı kúrdeli kezeńdi bastan keship otyr. Qara túnek qyspaqtan qutylýdyń jalǵyz joly – sónbegen úmitteı bolyp alystan jyltyrap, basty baǵytqa jol silteıtin shamshyraqtyń janyp-óshken álsiz jaryǵy. Bizdiń qoǵam da keme sekildi. Al endi qoǵamdy qıyndyqtan alyp shyǵar shamshyraq – ol aqparat quraldary. HH ǵasyrdyń basyndaǵy ult ustazy Ahmet Baıtursynovtyń «Gazet – halyqtyń kózi, qulaǵy hám tili» deýi de tegin emes edi. Dál osy aksıomanyń búgingi aqparat dáýirinde quny artpasa, kemimesi anyq. О́ıtkeni, qıyndyqqa tap bolǵan qoǵamnyń dertinen arylyp, denesin tiktep, baǵdaryn aıqyndaý úshin shynaıy aqparattyń aýadaı qajet ekenin tarlan tarıh talaı dáleldegen. Al jalǵan aqparattyń qateri indetten jaman ekeni de shyndyq. Sondyqtan da kún saıyn qanshama otbasy qımasynan aıyrylyp, qara jamylyp otyrǵanda bizdiń efırlerden toı toılaǵandaı taırańdaǵan, bı bılegendeı sekeńdegen tok-shoýlardy kórsetýimiz basqasyn bylaı qoıǵanda, adamgershilik qaǵıdalarymen qanshalyqty qabyspaq? Onyń ornyna taqyryptyq, tanymdyq dúnıelerdi halyqqa usynsaq durys bolar edi dep oılaımyz.

Qaı zamanda bolsyn aqparat quraldary memlekettik ıdeologııanyń basty salasy bolyp sanalady. Sondyqtan búkil el kóz tigip otyrǵan efırimizden halyqtyń kóńilindegini dóp basatyn, eldiń joǵyn joqtaıtyn, ulttyq dástúrlerimiz ben búkil adamzattyq qundylyqtardy nasıhattaıtyn habarlar men dúnıeler kórsetilse degen tilegimiz bar" delingen jazbada.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir