Qazaqstanda dárigerlerge tólenetin ústemaqyǵa 36 mlrd teńge bólindi

Qazaqstanda maýsym aıynda COVID-19-ben kúreske tartylǵan 53 myń medısına qyzmetkerine ústemeaqy tóleý júrip jatyr. Respýblıkalyq bıýdjetten medısınalyq saqtandyrý qoryna 35,7 mlrd teńge bólindi. Bul týraly MMSQ-nyń habarlamasynda aıtylǵan.

Naýryz aıynan maýsym aıyna deıin qor qarjylyq operator retinde medısına qyzmetkerleriniń jalaqysyna qosymsha 32 mlrd teńgeden astam qarjy tóledi.

Qor ókilderi aı saıyn ınfeksııamen qaýipti jaǵdaılarda jumysqa tartylǵan medısına qyzmetkerleriniń sany artyp kele jatqanyn atap ótti.

"Eger naýryz aıynda 19 myńnan astam qyzmetker ústeme alǵan bolsa, mamyr aıynda olardyń sany 40 myń adamǵa deıin ósti" delingen habarlamada.

Qazaqstanda epıdemııaǵa qarsy is-sharalarǵa qatysatyn medısına qyzmetkerleriniń jalaqysyn kóterý qarastyrylǵan. Densaýlyq saqtaý mınıstrliginiń buıryǵymen táýekel toptary, alýshylardyń tizimderin qalyptastyrý tártibi jáne tólemder mólsheri anyqtalǵan. Táýekel tobyna baılanysty medısına qyzmetkerlerine qosymsha 212 myń teńgeden 850 myń teńgege deıin tólenedi.

Ústemeaqy alýshylardyń tizimderin jedel shtabtar janynan qurylǵan óńirlik komıssııalar jasaıdy. Komıssııaǵa ákim orynbasarlary tóraǵalyq etedi. Olardyń quramyna sondaı-aq medısınalyq saqtandyrý qory fılıaldarynyń qyzmetkerleri, óńirlik memlekettik bas sanıtar dáriger, densaýlyq saqtaý basqarmalarynyń, úkimettik emes uıymdardyń ókilderi kiredi.

Koronavırýspen aýyrǵan medısına qyzmetkerlerine tólemderdi óńirlik komıssııalardyń sheshimi negizinde óńirlerdiń densaýlyq saqtaý basqarmalarynyń ótinimderi boıynsha eńbek jáne halyqty áleýmettik qorǵaý mınıstrligi tóleıdi.