Úkimettegi aýys-túıis: Jumaǵalıev ketti, onyń qyzmetin ýaqytsha Mýsın atqarady

Asqar Jumaǵalıev Qazaqstan Respýblıkasynyń sıfrlyq damý, ınnovasııalar jáne aeroǵarysh ónerkásibi mınıstri qyzmetinen bosatylyp, onyń ornyna ýaqytsha prezıdentiniń sıfrlandyrý jáne ınnovasııalyq tehnologııalar jónindegi keńesshisi bolǵan Baǵdat Mýsın  keldi.

Úkimet qaýlysymen sıfrlyq damý, ınnovasııalar jáne aeroǵarysh ónerkásibi mınıstrliginiń birinshi vıse-mınıstri bolyp taǵaıyndalǵan Baǵdat Mýsın qyzmetten ketken Jumaǵalıev ornyna ýaqytsha mınıstr qyzmetin atqarady.  

Premer-mınıstr saıtynda jarııalanǵan aqparattyq habarlamada mınıstrliktiń aldyna memlekettik qyzmetter men ekonomıka salalaryn sıfrlandyrý jóninde naqty mindetter qoıylǵany, densaýlyq saqtaý jáne bilim berý salasyn sıfrlandyrý máselesine erekshe kóńil bólý qajettigi aıtylǵan.

Eks-mınıstr Asqar Jumaǵalıev tusynda mınıstrlik tótenshe jaǵdaı kezinde elektrondyq qyzmetterdi durys júrgize almaǵany úshin ótkin synǵa ushyraǵan. 42500 teńge áleýmettik tólemge ótinim qabyldaıtyn servıster bastapqyda birneshe kún jóndi jumys istemegen.

Qashyqtan oqytý kezinde eldimekenderdiń ınternetpen qamtylý máselesi  qaǵaz júzindegi derekterden  múlde alshaq ekeni áshkerelengen.

Osy rette Baǵdat Mýsınge aýyldyq eldi mekenderdi sapaly ınternetpen qamtamasyz etý, Qazaqstannyń ınnovasııalyq ekojúıesin damytý máseleleri  júktelip otyr.

Baǵdat Mýsın 1983 jyly Pavlodar oblysy, Ekibastuz qalasynda dúnıege kelgen. 

2004 jyly Súleımen Demırel atyndaǵy ýnıversıtetti ınjener-baǵdarlamashy, 2006 jyly Qazaq quqyqtaný jáne halyqaralyq qatynastar ınstıtýtyn quqyqtaný mamandyǵy boıynsha támamdaǵan. 

2004 jylǵa deıin bilim ala júrip «NAT» AQ, «Izet» JShS jáne basqa da jeke kompanııalarda jumys istegen. 

2004 jyldyń qyrkúıek aıynan bastap «Ulttyq aqparattyq tehnologııalar» aksıonerlik qoǵamynda ınjener-baǵdarlamashy, Kýálandyrý ortalyǵy bóliminiń basshysy, memlekettik organdarda IT bólimsheler qurý departamenti dırektorynyń orynbasary. 

2004-2007 jyldary qosymsha «AMANAT-insurance» BK» aksıonerlik qoǵamynda aqparattyq tehnologııalar jónindegi keńesshi-konýlttant. 

2007 jyldan bastap Ádilet mınıstriniń aqparattyq tehnologııalar jónindegi keńesshisi jáne Aqparattyq tehnologııalar basqarmasynyń basshysy. 

2010 jyldyń sáýir aıynan Baılanys jáne aqparat mınıstrliginde (Kólik jáne kommýnıkasııa mınıstrligi) Aqparattyq tehnologııalar salasyndaǵy memlekettik saıasat departamenti dırektorynyń orynbasary. 

2011 jyldyń sáýir aıynan Memlekettik qyzmetterdi avtomattandyrýdy baqylaý jáne Halyqqa qyzmet kórsetý ortalyqtarynyń qyzmetin úılestirý komıteti tóraǵasynyń orynbasary. 

2012 jyldyń naýryz aıynan Memlekettik qyzmetterdi avtomattandyrýdy baqylaý jáne Halyqqa qyzmet kórsetý ortalyqtarynyń qyzmetin úılestirý komıteti tóraǵasy. 

2014 jyldyń sáýir aıynan «Ulttyq aqparattyq tehnologııalar» aksıonerlik qoǵamynyń Basqarma tóraǵasy. 

2014 jyldyń tamyz aıynan «Qazposhta» aksıonerlik qoǵamynyń Basqarma tóraǵasy. 

2017 jyldyń qańtar aıynan Qazaqstan Respýblıkasynyń Bas Prokýratýrasynda Quqyqtyq statıstıka jáne arnaıy esepke alý jónindegi komıtetiniń tóraǵasy. 

2018 jyldyń mamyr aıynan Bi Group qurylys holdıngi Basqarma tóraǵasynyń orynbasary jáne korporatıvtik-venchýrlik qordyń basshysy. 

2019 jyldyń maýsym aıynan IT kásipker, ReKassa, Tastamat jáne basqa da IT-startaptardyń negizin qalaýshy. 

2020 jyldyń naýryz aıynynan beri Qazaqstan Respýblıkasy prezıdentiniń sıfrlandyrý jáne ınnovasııalyq tehnologııalar jónindegi keńesshisi bolyp qyzmet etip keldi. 

«Eren eńbegi úshin» medalimen, «Qazaqstan Respýblıkasynyń Táýelsizdigine 20 jyl» merekelik medalimen marapattalǵan. 

Qazaq, orys, aǵylshyn tilderin erkin meńgergen, túrik tilinde oıyn jetkize alady.