20 Shilde, 2020 NEWS

Ishki ister mınıstri Toqaevqa karantındik sharalardy buzý faktisi boıynsha esep berdi

akorda.kz

Ishki ister mınıstri Erlan Turǵymbaev prezıdent Qasym-Jomart Toqaevqa dári-dármekti zańsyz satýdyń jolyn kesý jáne karantın sharalaryn buzý faktileri týraly baıandady. Bul týraly Aqorda habarlady.

Toqaev koronavırýs indetiniń taralýyna qarsy kúres máseleleri jóninde ótken selektorlyq keńeste quqyq qorǵaý, densaýlyq saqtaý jáne jergilikti atqarýshy organdar dárilik zattar men medısınalyq qural-jabdyqtardy satý boıynsha quqyq buzýshylyqtardy anyqtaýda jáne onyń jolyn kesýde turaqty túrde vedomstvoaralyq jumys júrgizý qajettigin basa aıtty.

Keńeste Ishki ister mınıstri E.Turǵymbaev esep berip, IIM densaýlyq saqtaý jáne jergilikti atqarýshy organdarmen birlesip, 18 myńnan astam reıd júrgizgeni týraly baıandady.

Kórsetilgen kezeńde barlyǵy 4000-nan astam karantındi buzýshylar anyqtalyp, shara qoldanyldy. Atap aıtqanda mundaı jaǵdaı Almaty qalasynda, Aqmola, Túrkistan, Almaty jáne Jambyl oblystarynda kóp tirkeldi.

Dárilik zattar men medısınalyq maqsattaǵy buıymdardy zańsyz satýdyń jolyn kesý boıynsha (5 shildeden bastap) ishki ister organdary zańsyz aınalymnan 65 myńnan actam qorap dárilik preparattardy, jarty mıllıon medısınalyq maska men 36 myń medısınalyq buıymdy tárkilegen. Olar qymbat baǵada satylǵan.

Sondaı-aq ishki ister organdary dárilik zattardy zańsyz satýdyń 348 faktisiniń jolyn kesti. Polısııaǵa 284 adam jetkizildi, onyń 138-si medısına salasynyń qyzmetkerleri. Dári-dármektiń kóp kólemi Nur-Sultan, Almaty, Shymkent, Qaraǵandy jáne Atyraý qalalarynda alyndy.

Alynǵan medısınalyq preparattar aýmaqtyq densaýlyq saqtaý organdaryna beriledi.

E.Turǵymbaev ishki ister organdary júrgizip jatqan qoǵamdyq tártipti saqtaý jáne qoldanystaǵy shekteý sharalaryn qamtamasyz etý jumystary týraly baıandady. Bul mindetterdi oryndaý úshin kúndelikti 13 000 polıseı, Ulttyq ulannyń áskerı qyzmetshileri jáne 1000 erikti  jumys isteýde. 4 oblysta 2 sanıtarııalyq jáne 9 blokbeket qoıyldy. 241 juqtyrý oshaǵy men 366 karantındik nysan qorshaýǵa alyndy.

Keńes qorytyndysy boıynsha, prezıdent ishki ister organdary bul baǵyttaǵy jumysty jalǵastyratynyn, al, kináliler zańnamaǵa sáıkes jazalanatynyn  atap ótti.

Bul tapsyrmanyń iske asyrylýyn baqylaý QR Prezıdenti Ákimshiliginiń úılestirýmen Qaýipsizdik Keńesiniń Apparatyna júkteldi.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir