18 Shilde, 2020 NEWS

Toqaev: Ákimder kúrdeli jaǵdaıda jumys isteı almaıdy

Aqorda jarııalaǵan sýret

PrezıdentQasym-Jomart Toqaevtyń qatysýymen koronavırýs indetiniń taralý ahýaly jónindegi vedomstvoaralyq komıssııanyń otyrysyn ótkizdi. Otyrys barysynda prezıdent úkimet pen ákimderdiń jumysyn qatań synǵa aldy.

– Baıandama betinde jaǵdaı baqylaýda bolǵanymen, is júzinde olaı emes. Prezıdent Ákimshiligine elimizdiń barlyq dárihanalaryndaǵy dári-dármekterdi tekserý jóninde tapsyrma berdim. Nátıjesi kóńil kónshiterlik emes. Batys Qazaqstan, Atyraý, Jambyl, Qaraǵandy oblystarynda, Nur-Sultan men Almatyda dári tapshylyǵy, uzyn-sonar kezek áli de bar. Asa qat dárilerdiń baǵasy qymbat ekeni anyqtaldy. Kóleńkeli bıznestiń kólemi artyp bara jatyr, – dedi Qasym-Jomart Toqaev.

Quqyq qorǵaý organdary kóterme jáne bólshek saýdamen aınalysatyn dárihanalarda reıdter men tekserýler júrgizgen. Tekserý qorytyndysy boıynsha zańsyz dári-dármek saýdasymen aınalysqan 270 adam qylmystyq jáne ákimshilik jaýapkershilikke tartylǵan, onyń 116-sy medısına qyzmetkeri. Memleket basshysy bul baǵyttaǵy jumystardyń jalǵasa beretinin, sondaı-aq kináliler zańǵa sáıkes jazalanatynyn atap ótti.

Prezıdent úkimettiń koronavırýs pen ókpe qabynýynyń statıstıkasyn birizdendirý týraly sheshimi pandemııanyń taralý kólemin naqty kórýge múmkindik beretinin aıtty. Sonymen qatar statıstıka men saraptamalardaǵy kemshilikterdiń, josparlaýdaǵy tıimsizdiktiń kesirinen óńirler ózderine qajetti dári-dármektiń kólemin naqtylaı almaı otyrǵanyn jetkizdi. Barlyq problema jumysty durys josparlamaýdan bastalatynyn aıtqan Qasym-Jomart Toqaev, muny kásibı sheberliktiń tómendigi dep baǵalady.

Elde shekteý sharalary qabyldanǵanymen halyq áli de otbasylyq merekeler jasaýdy jalǵastyryp jatyr. Atap aıtqanda, mundaı jaǵdaı Túrkistan, Jambyl, Almaty oblystary men Shymkent qalasynda baıqalady. Prezıdent osy rette ákimder karantın rejımin saqtaýǵa baǵyttalǵan túsindirý jumystaryn álsiz júrgizgenin aıtyp, synǵa aldy.

– Ákimder asa kúrdeli jaǵdaıda jumys isteı almaıdy. О́zekti problemalardy shuǵyl sheshýdi, azamattarǵa memlekettik saıasatty durys túsindirýdi bilmeıdi, – dep málimdedi Prezıdent.

Onyń sózinshe, úkimet músheleri de, ákimder de toqmeıilsýdiń, masaıraýdyń qaqpanyna túsken.

Ilmek sózder: toqaev ákim

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir