Oral qalasynda erekshe syrǵa salý rásimi ótti. Qalyńdyqqa zoom-platformasy arqyly syrǵa salyndy. Bul týraly 24.kz habarlady.

– 16 shilde kúni syrǵa salý rásimi bolatyn edi. 17-si qyz uzatý toıy bolýy kerek edi. Endi onyń bárin toqtatýǵa týra keldi. Jalpy elimizde, dúnıejúzinde bolyp jatqan jaǵdaılarǵa baılanysty. Biz birinshi maýsymnyń 13-i dep belgilegenbiz. Sosyn ony 17 shildege jyljyttyq. Sosyn taǵy doǵarýǵa týra keldi, – dedi ákesi Jarylǵap Dúısenov. 

Onyń aıtýynsha, aýlaǵa kıiz úı tigip, nemese tyǵylyp toı jasaýǵa bolar edi. Biraq Dúısenovter otbasy ondaıǵa barmaǵanyn atap ótti.

Sondaı-aq indet órship turǵan kezde bolashaq qudalary men týma-týystyń densaýlyǵyn qaterge tikkisi kelmepti.

Sondyqtan syrǵa salý, quda túsý rásimin onlaın ótkizýdi uıǵarypty. Aǵaıynǵa Zoom baǵdarlamasy arqyly shaqyrtý berilgen. Kókshetaýlyq qudalar syrǵa men syı-qadeni kýrer arqyly jiberipti.

– Nur-Sultan, Almaty, Kókshetaý, aýyldan týma-týysqandar qosyldy, tanystyq. Asaba bárin moderator bolyp ótkizdi. Bizder óte rızamyz. Bastysy, balalar baryp qosylyp, oqýyn jalǵastyrsyn. Al bergi jaǵynda qudalarmen aralasyp turamyz dep kelistik. Qonaqtardy shaqyrýǵa qoryqtyq mynadaı indet bolǵasyn. Maqsat sol ǵoı, aýyrmasyn dep. Tipti kórshiler de bolǵan joq, – dedi anasy Nurgúl Qazımova.

26 jastaǵy Qorlan "Nazarbaev ýnıversıtetiniń" hımııa fakýltetin bitirgen. Keıin Amerıkaǵa oqýǵa túsken. Alaıda pandemııaǵa baılanysty magıstrlik dárejemen shektelýge týra kelipti. Endi Ońtústik Koreıaǵa doktorantýraǵa tapsyrypty. Bolashaq jary da osy elde oqyp jatyr.

– Árıne, osyndaı jaǵdaıǵa túsinýshilikpen qaradyq. Sondyqtan toıdy ótkizbeýdi sheshtik. Biraq men toıdy ótkizbegenge eshqandaı renjigen joqpyn. Sebebi úılený toıy bolmasa da Mádımen, árıne, neke qııamyz. Men Ońtústik Koreıaǵa barǵasyn 14 kún karantınde jatamyn. Osy elshilike baryp, ótinish jazý kerek. 30 kúnnen keıin baryp nekemizdi qııamyz Qazaqstannyń elshiliginde, – dedi qalyńdyq Qorlan Dúısenova.

14 shildeden beri batysqazaqstandyq úsh turǵyn karantın rejımin buzyp, toı jasaǵany úshin jaýapqa tartylǵan bolatyn.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir