"Hannyń qyzysyz ba?". Ábdiqalyqova jelide taraǵan vıdeoǵa túsinikteme berdi

Qyzylorda oblysynyń ákimi Gúlshara Ábdiqalyqova qala ishindegi joldy jappaýdy suraǵan áıeldiń vıdeosyna qatysty túsinikteme berdi.

Buǵan deıin Jańaqorǵan aýdanynyń turǵyny Qyzylorda oblysynyń ákimi keledi dep joldy jaýyp tastaǵanyn aıtyp, vıdeo jarııalaǵan.

Ábdiqalyqovanyń aıtýynsha, aımaq basshysy da, aýdan ákimi de joldy jabýǵa tapsyrma bermegen.

– Búgin Jańaqorǵan, Shıeli aýdandaryndaǵy aýrýhanalardy aralap, dári-dármekpen, ottegimen qamtamasyz etý máselelerin qarap jatyrmyn. Osyndaı issapar kezinde Jańaqorǵan aýdany ınfeksııalyq aýrýhanasynyń qasynda Sandýǵash Turlybekova degen áıel maǵan kelip, joldyń jabylǵanyn aıtty, – dedi oblys ákimi.

Sonymen qatar ol osy istiń mán-jaıyn anyqtaýdy oblystyq polısııa departamenti basshysyna tapsyrǵanyn jetkizdi.

– Men joldy jabý týraly tapsyrma bergen joqpyn, aýdan ákimi de eshqandaı tapsyrma bermedi. Sol jerdegi ishki ister bóliminiń basshysy da ondaı tapsyrma berilmegenin aıtyp otyr. Bul ýchaskelik polısııanyń sheshimi bolsa, onyń is-áreketine qatysty oblystyq departament basshysy Sultan Bektórege tapsyrma berdim, – dedi Ábdiqalyqova.

Endi polısııa departamenti ýchaskelik polısııanyń is-áreketi qanshalyqty durys ekenin, qandaı kemshilik jibergenin anyqtaıdy.

Buǵan deıin jelide taraǵan vıdeoda Jańaqorǵan kentiniń turǵyny Ábdiqalyqovanyń aldynan shyǵyp, oblys ákimi bolasyz ba dep naqtylap suraıdy. Sodan keıin qoǵamdyq kólik jarty joldan tastap ketkenin, joldyń jabylǵanyn aıtady.

– Siz osynda kele jatyrmyn dep joldy japtyrdyńyz ba? Bizdi joldan túsirip ketti. Joldy japtyratyn hannyń qyzysyz ba? Nege kele jatqanda osylaı jasaısyzdar? Halyqty qorlaısyzdar, halyqpen birge emessizder, –degen bolatyn oblys turǵyny.

Vıdeoda oblys ákimi joldy japtyrmaǵanyn aıtqan.