42 500 teńge otbasyndaǵy bala sanyna qaraı berile me?

QR Eńbek jáne halyqty áleýmettik qorǵaý mınıstri Birjan Nurymbetov 42500 teńge járdemaqy týraly Arýjan Saınnyń usynysyna jaýap berdi.

Arýjan Saın 42500 teńgeni otbasyndaǵy bala sanyna qaraı taǵaıyndaý qajettigin aıtqan edi. 

Mınıstr tabysy tómen otbasylardyń adam sanyna qaraı taǵaıyndalatyn ataýly áleýmettik kómek alatynyn aıtty. 

– Qazirgi ýaqytta 128 myń otbasy nemese 660 myń adam ataýly áleýmettik kómek alady, onyń ishinde 442 myń bala bar. Olar da memlekettiń kepildendirilgen áleýmettik paketin alady. Sondyqtan, balaly otbasylarǵa áleýmettik tólem saıasaty júzege asyrylyp keledi. Degenmen, ár tólemniń negizdemesi bolatynyn túsiný kerek. 42 500 teńge – memlekettiń jumys isteıtin azamattarǵa degen az da bolsa kómegi. Eger bir otbasynda birneshe adam jumys istese, tıisinshe árqaısysyna 42 500 teńgeden beriledi, – dedi Birjan Nurymbetov.

Sondaı-aq, ol 42 500 teńge – elimizdegi jalǵyz áleýmettik tólem emes ekenin aıtty.

– Bizde bıýdjetten 39 áleýmettik tólem, aı saıyn shamamen 300 mlrd teńge tólenedi. Onyń ishinde 8 járdemaqy men 3 tólem – balaly otbasylarǵa qoldaý kórsetýge baǵyttalǵan. Bala týǵanda beriletin tólem, bala kútimi jáne bıyl bala sanyna qaraı taǵaıyndalatyn jańa memlekettik áleýmettik járdemaqy engizdik. Búginde 1 mln 700 myńnan astam bala tárbıelep otyrǵan 390 myń kópbalaly otbasy osy járdemaqyny alyp otyr, – dep atap ótti mınıstr Ortalyq kommýnıkasııalar qyzmetinde.