Májilis depýtattary koronavırýs indetiniń taralýyna qarsy birqatar máselelerdi baqylaýǵa aldy.

Qazirgi ýaqytta Májilis depýtattary óńirlerde koronavırýspen kúres jónindegi keshendi jumystarǵa belsene aralasyp júr.

Olar qoǵamdyq baqylaý toptarymen birge dárihanalarǵa baryp, dári-dármekterdiń, medısınalyq maqsattaǵy buıymdar men baǵalarǵa monıtorıng júrgizýde. Sonymen qatar, eriktilerdiń jumysyn uıymdastyrýǵa járdemdesip, medısınalyq mekemelerge gýmanıtarlyq kómektiń jetkizilýi men taratylýyn, halyqty qajetti taýarlarmen jáne azyq-túlikpen qamtamasyz etýdi baqylaýǵa aldy.

Sondaı-aq, dárigerlerdiń jumys jaǵdaılary men aýrýhanadaǵy emdelýshilerdiń jaǵdaılaryna erekshe kóńil bólinip jatyr.

Májilis depýtattary Záýresh Amanjolova men Serik Qusaıynov Almatydaǵy Ortalyq qalalyq klınıkalyq aýrýhanaǵa baryp, medısına qyzmetkerlerimen kezdesti. Kezdesý barysynda koronavırýspen emdelip jatqan emdelýshilerdi aralap, aýrýhananyń dárihana qoımasymen tanysty.

Medısınalyq mekeme bir mezgilde COVID-19 dıagnozy qoıylǵan 320 naýqasty qabyldaı alady.

Kún saıyn aýysymǵa aýrýhananyń 150 qyzmetkeri túsedi. Medısınalyq mekeme barlyq týyndaǵan máselelerdi jyldam sheshýge tyrysýda.

– Biz jańa modýldik aýrýhanany arnaıy teksermedik. О́ıtkeni, ol jańa apparattar men preparattarmen qamtamasyz etilgen. Al bul mekeme 70-shi jyldary salynǵan jáne bastapqyda osyndaı maqsattarǵa arnalmaǵan. Degenmen, ol qaıta jabdyqtaldy. Sonymen qatar, koronavırýsty emdeýge arnalǵan dári-dármekterdiń bir aıǵa jetetin qory bar, – dedi májilis depýtaty Záýresh Amanjolova.

Aýrýhana basshylyǵy emdelýshilerdi qabyldaý múmkindigin arttyrý úshin qosymsha sharalar qabyldanyp jatqanyn aıtty.

Jalpy aıtqanda, májilis depýtattarynyń aımaqtardaǵy jumysynyń basty baǵyty dárihanalarda dári-dármekter men medısınalyq maqsattaǵy buıymdardyń, sondaı-aq dári-dármekterdiń baǵasyna monıtorıng júrgizý.

Sybaılas jemqorlyqqa qarsy is-qımyl agenttigi qyzmetkerlerimen jáne belsendilermen birge májilis depýtaty Snejanna Imasheva Nur-Sultan qalasynda, al májilismender Gleb Shegelskıı men Quralaı Qaraken Aqtóbe qalasyna bardy. Májilis depýtattary Irına Aronova men Aıgúl Nurkına Qostanaı men Pavlodardaǵy medısınalyq mekemelerge gýmanıtarlyq kómektiń taralýyn baqylaýda ustaıtyn bolady. Májilismender, eń aldymen, gýmanıtarlyq taýarlardyń, ásirese, medısınalyq uıymdarǵa jetkizilýine basa nazar aýdarýda.

Sonymen qatar, Májilis depýtattary halyqty áleýmettik qoldaýǵa erekshe mán berýde. Májilis depýtaty Erlan Barlybaev Almaty oblysyndaǵy Baıserke aýylyna baryp, 12 áleýmettik jaǵdaıy tómen otbasyna kómek berdi. Aýyl turǵyndarymen áńgimelesý barysynda ol eshkimniń qoldaýsyz qalmaıtynyn aıtyp, halyqty sabyrly bolýǵa shaqyrdy.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir