Qazaqstan Tájikstanǵa gýmanıtarlyq kómek retinde ne bermek?

Qazaqstan Tájikstanǵa gýmanıtarlyq kómek retinde portatıvti ókpeni jasandy jeldetý apparattaryn bermek. Bul týraly búgin  ortalyq kommýnıkasııalar qyzmetinde ótken brıfıng kezinde densaýlyq saqtaý vıse-mınıstri Lıýdmıla Bıýrabekova aıtty. 

Onyń sózinshe, úkimet Tájikstanǵa gýmanıtarlyq kómekti jyl sońyna qaraı jiberedi. 

– Qazirgi ýaqytta barlyq el bir-birine kómek kórsetip jatyr. Elimizge de basqa memleketter gýmanıtarlyq kómek berýde. Rasynda da Qazaqstan úkimeti Tájikstanǵa jyldyń sońyna qaraı portatıvti ókpeni jasandy jeldetý apparaty túrindegi gýmanıtarlyq kómek kórsetý týraly máseleni qarastyryp jatyr. Bul portatıvti apparat ekendigin atap ótkim keledi. Ol pasıentti jedel járdem kóligimen tasymaldaý úshin qoldanylady, – dedi vıse-mınıstr. 

Lıýdmıla Bıýrabekova portatıvti ókpeni jasandy jeldetý apparaty Aqmola oblysynda shyǵarylatynyn aıtty. 

– Búginde atalǵan óndirýshi óziniń óndiristik qýatyn arttyryp otyr. Kásiporyn túrkııalyq kompanııamen birge qazirgi ýaqytta bizge asa qajetti bolyp otyrǵan stasıonarlyq ókpeni jasandy jeldeý apparatyn da shyǵarýdy josparlap otyr. О́ndiris taıaý aralyqta jolǵa qoıylady jáne jyldyń sońyna deıin elimizdiń barlyq aýrýhanalaryna qajetti portatıvti jáne stasıonarlyq ókpeni jasandy jeldetý apparattarmen qamtamasyz etedi, – dedi vıse-mınıstr.